Шәкіртақысын ойынға тіккен студент саябаққа келушіні тонап кеткен

Тұран АПБ-ның «102» арнасына түнгі уақытта телефон ұрлығы туралы арыз түсті. Құрбысымен саябаққа серуендеуге барған азаматша құны 150 000 теңге тұратын смартфонынан айырылып қалғанын жеткізді.

Бейтаныс жігіт алдымен жәбірленушінің құрбысынан сөйлесіп алу үшін гаджетін уақытша сұрап, іздеген адамымен байланыса алмаған соң кері қайтарып берген. Кейін интернет арқылы хабарласып көру үшін, екінші бойжеткеннің телефонын алып, бірден қаша жөнелген.

Оқиға орнына дереу учаскелік полиция қызметкерлері барды. Олар жергілікті тұрғынның сипаттамасы бойынша ер адамның қашқан бағытын анықтап, жедел іздестіру шараларын жүргізді. Атқарылған жұмыстардың нәтижесінде күдікті 3 сағаттан соң қала көшелерінің бірінде ұсталып, полиция басқармасына жеткізілді.

Белгілі болғандай, студент анасына беруге келіскен шәкіртақысын ойынға тігіп ұтылып қалғаны, кейін сол ақшаны орнына қою үшін амалсыз осындай қадамға барғаны анықталды. Ол ұрланған мүлікті ломбардқа өткізуді жоспарлаған.

Қазіргі таңда, смартфон заңды иесіне қайтарылды. Аталған жайтқа қатысты ҚР ҚК-нің 191-бабы “Тонау” бойынша сотқа дейінгі тергеу амалдары жүргізілуде.

Шымкент қаласы ПД ескертеді: жоғарыда көрсетілгендей тонау жайттарының құрбаны болмау үшін, бейтаныс адамдарға бағалы заттарыңыз бен жеке мүліктеріңізді сеніп тапсырмаңыздар.

Бұдан бөлек, Әл-Фараби АПБ-на қаладағы сауда орталықтарының бірінде орналасқан косметика дүкенінен парфюмерия ұрланғаны туралы хабарлама келіп түсті.

Арызданушы екі тұтынушының сауда орнынан парфюмерия өнімдерін жасырын түрде алып кеткенін көрсетті. Сондай-ақ, олар бұған дейін де үш рет осы дүкенге келіп ұрлық жасаған. Криминалдық полиция қызметкерлері бейнебақылау камераларының жазбаларын тексеріп, қылмысқа қатысы бар адамдарды анықтады. Олар жергілікті тұрғындар – анасы мен қызы болып шықты.

Жалған сатып алушылар сөредегі тауарларды мұқият қарап жүргендей кейіп танытып, қымбат әтірлерді тез әрі байқатпай сөмкеге салып, артынша сауда нүктесінен кетуге асыққан. Қазіргі таңда, полицейлер ҚР Қылмыстық кодексінің 188-бабы «Ұрлық» бойынша тергеу жүргізіп жатыр. Тергеу амалдары аяқталған соң қылмыстық іс процессуалдық шешім қабылдау үшін сотқа жолданады.