Әл-Бейне Зарипованы өлтірген күйеуіне үкім шықты
Алматыда сот Әл-Бейне Зарипованың айуандықпен өлтірілуіне қатысты атышулы іс бойынша үкім шығарды, – деп хабарлайды basnews.kz.
Сот үкімі бойынша, Әл-Бейне Зарипованың бұрынғы күйеуі қасақана кісі өлтіргені және бөтеннің мүлкін ұрлағаны үшін кінәлі деп танылды. Ол 15 жылға бас бостандығынан айыру жазасын қауіпсіздігі орташа режимдегі колонияда өтейтін болды.
Еске салайық, Әл-Бейне Зарипованы қатыгездікпен өлтіру туралы резонанс тудырған іс бойынша сот тамыздың ортасында басталды. Айыпталушы тарапта – марқұмның күйеуі. Мемлекеттік айыптаудың мәліметі бойынша, 2024 жылдың 31 қаңтарында сағат 03:30 шамасында Зарипов Алматы әуежайында Дубайдан ұшып келген әйелімен кездесіп, онымен бірге үйіне қайтқан. Онда ер адам қызғанышқа байланысты жанжал кезінде жұбайына көптеген пышақ жарақаттарын салып, әйел сол жерде қайтыс болған.