Өскеменде жаңа мүмкіндіктер алаңы – «JastarOskemen» комьюнити орталығы ашылды
Өскеменде шығыстың жалынды жастарын біріктіріп, жаңа идеялар мен тың ойларды жүзеге асыруға мүмкіндік беретін жаңа алаң – «JastarOskemen» комьюнити орталығының ашылуы өтті.
Шығыста ізденімпаз жастар өте көп. Әртүрлі бағытта дамып, волонтерлік ұйымдар құрып, көптеген әлеуметтік бастамаларды жүзеге асырып жүрген жастардың басын қосатын, олардың ерікті жұмыстарын жүйелі іске асыруға мүмкіндік беретін орталықтың ашылуы көптеген жасқа қолдау болды.
Бұл комьюнити орталық жастардың кездесіп, ақылдасып, ой қосатын орындары ғана емес, жаңа идеялар мен стартаптардың дүниеге келетін ошағы.
– Біз әлеуметтік бағытта жұмыс істейтін ұйымбыз. Көпшілігіміз студент немесе жұмысшы жастар болғандықтан, тұрақты офисіміз болмады. Осы уақытқа дейін кітапхана сынды жерлерде жиналып, жоспар құрып, жұмысымызды жүйелі жүргізуге тырыстық. Бірақ кітапханалардағы коворкинг алаңдарында кейде шаралар өтіп, бос болмай жатады. Ал бұл комьюнити орталық – тұрақты жиналыстар мен кездесулер өткізетін, алға қойған мақсаттарымызды жүзеге асыруға септігін тигізетін алаң, – деді «Enactus EKTU» ұйымының мүшесі Нұрбол Мамырханов.
Орталықта тегін ән жазуға мүмкіндік беретін заманауи жабдықталған студия, би үйірмесіне арналған зал, ағылшын тілін 6-78 жас аралығындағы осал топтар мен жастарға үйрететін курс, жайдарманшыларға арналған орын, қазақ тілінің мәртебесін көтеру жолында еңбек етіп жүрген «Eastler» тобы, өңірдегі дебатты дамытушылар мен эко-еріктілер жиналып, өз кездесулерін өткізеді.
«JastarOskemen» комьюнити орталығының ашылу салтанатына облыс әкімінің бірінші орынбасары Нұрымбет Сақтағанов пен қала әкімі Алмат Ақышов қатысты.
— Мемлекет басшысы Қасым-Жомарт Тоқаев әрдайым жастар саясатына ерекше назар аударып, Үкіметке, жергілікті атқарушы органдарға тиісті тапсырмалар беріп келеді. Өйткені, болашағын ойлаған ел озады. Бұл орталық – мемлекеттің талантты жастарға көрсеткен қолдауының бір көрінісі. Осы орталықта үлкен бастамалар бастап, еліміздің болашағы үшін қызмет жасай беріңіздер, — деді Нұрымбет Сақтағанов.
Жастар орталығына қосылып, өз бастамаларын жүзеге асыруды көздеген кез келген белсенді бұл орталықтан өз орнын таба алады.