Качкар шыңдары: Түркияның жаһандық туризмдегі жаңа белесі

Түркияның Қара теңіз аймағында, Ризе мен Артвин провинцияларының түйіскен жерінде орналасқан зәулім Качкар таулары жаһандық деңгейдегі спорттық және табиғи оқиғалардың орталығына айналуда. Төрт мезгіл бойы табиғат жанашырлары мен экстремалды демалыс әуесқойларын баурап алатын осынау мекен 2026 жылдың сәуірінде халықаралық туристік көрмеге иелік етпек.

Түркияның Туризмді ілгерілету және дамыту агенттігінің (TGA) қолдауымен 17-18 сәуір аралығында Ризе қаласында өтетін бұл шара Качкар тауларының бірегей ландшафтын әлемдік тартылыс нүктесіне айналдыруды көздейді. Ризе шай базарында (Tea Bazaar) ұйымдастырылатын көрмеге 1000-нан астам сала маманы мен 3000-ға жуық келуші жиналып, өңірдің туристік әлеуетін талқылайды.

Теңіз деңгейінен 3937 метр биіктікке көтерілген Качкар шыңы — альпинизм мен треккинг үшін таптырмас орын. Мұнда 50-ден астам альпі көлі, терең аңғарлар мен жап-жасыл ормандардың үйлесімі ерекше экожүйе құрайды. Қыс айларында тау шаңғысы, сноуборд және хелиски (тікұшақпен тау шыңына шығып сырғанау) әуесқойлары үшін нағыз жұмаққа айналады.

Өткен жылы сәтті басталған KAÇKAR BY UTMB тау ультрамарафоны биыл да жалғасын таппақ. 11-13 қыркүйек аралығында өтетін бұл халықаралық дода әлемдік UTMB сериясының бір бөлігі ретінде ең мықты желаяқтарды Качкар соқпақтарында тоғыстырады.

Качкар тек спортпен ғана емес, өзінің бай мәдени мұрасымен де құнды. Келушілер мұнда:

• Этно-туризм: Жергілікті халықтың дәстүрлі қолөнерін тамашалап, «тулум» (қапсырнай) үніне елтіп, «хорон» биінің куәсі бола алады.

• Сауықтыру: Айдер жайлауындағы термалды бұлақтар мен таза тау ауасы денсаулықты оңалтуға таптырмас мүмкіндік береді.

• Гастрономия: Әйгілі Качкар балы, емдік шөптер мен түріктің хош иісті шайы кез келген саяхатшының талғамынан шығады.

Алдағы көрме мен қыркүйектегі KAÇKAR BY UTMB марафоны Түркияның солтүстік өңірін жаһандық туризм картасындағы басты бағыттардың бірі ретінде нығайта түсері анық.