BasNewsЖаңалықтар

Түркістандағы төрт бала мен олардың анасының өлімі: қайғылы оқиғаның мән-жайы анықталды

Өңірлік коммуникациялар қызметінің мәліметінше құзырлы органдар Түркістандағы қайғылы жағдай себептерін анықтау үшін жан-жақты тергеу жүргізіп жатыр. Арнайы комиссия шұғыл брифинг өткізіп, алғашқы мәліметтермен бөлісті, деп хабарлайды BasNews.kz.

Оқиға болған жерді тексеру барысында ТЖМ, полиция, газ қызметкері үйдің 3 бөлмелі болғанын, онда ирандық стильдегі пеш орнатылғанын анықтады. Пеш тұрған бөлме үйдің ортасында, екі жағында екі бөлме орналасқан. Бұл туралы құзырлы орган басшылары қатысқан брифингте белгілі болды. Үй табиғи газға қосылған, өрт белгілері анықталған жоқ.

“Тексеру барысында пешке гофрленген бұрма қосылғаны анықталды. Ол пеште жанған қалдықты 1,5 метрде орналасқан қабырғадағы тесік арқылы далаға шығарады. Бұрма 5-7 сантиметр ғана. Күшті жел әсерінен пештегі айналым нашарлаған. Осыдан кейін улы газ үйдің ішіне тараған”, – деді облыстық ТЖД басшысы Нұрғали Жүнісов.

Облыстық мемлекеттік қызметкерлер көмек ретінде бір күндік жалақысын аударуға ниетті.

“Қайғылы оқиға бойынша қылмыстық іс қозғалып, алдын ала тергеу жүргізіліп жатыр. Тергеу нәтижесінде жауапты тұлғалар кінәсі анықталса, заңға сәйкес жауапқа тартылады. Қызылорда облысы Жаңақорған ауданындағы жерлеу рәсіміне Түркістан қаласының әкімі Рашид Аюпов қатысып жатыр. Жерлеу рәсіміне жұмсалған және басқа да материалдық шығындар толық өтеледі. Түркістан облысы әкімдігі тарапынан зардап шеккен отбасыға қаржылай көмек көрсетіледі”, – деді облыс әкімінің бірінші орынбасары Арман Жетпісбай.

Еске салайық, 27 ақпан күні сағат 18:35-те Түркістан облыстың ТЖД-ның «103» қызметінен Түркістан қаласындағы жеке тұрғын үйде көршілері 5 адамның, оның ішінде кәмелеттік жасқа толмаған 4 баланың мәйітін тауып алғаны туралы хабарлама түсті. Үй ішінде өрт болмаған.

Қайғылы жағдайдың себебін анықтау бойынша арнайы комиссия құрылды. Оқиға орнына аймақ басшысы Өмірзақ Шөкеев барды. Ол оқиғаның тергеу барысын жеке бақылауына алып, қаза болғандардың туыстары мен жақындарына көңіл айтты.

Back to top button
Close