Facebook, Instagram және WhatsApp желілеріндегі ақаудың себебі белгілі болды
Инженерлер Facebook әлеуметтік желісі істен шығуына маршрутизаторлар баптауындағы қате өзгерістер себеп болғанын мәлімдеді, – деп хабарлайды Basnews.kz тілшісі.
«Біздің инженерлер мәліметтерді өңдеу орталығы аралығындағы желі трафигінің координациясын бақылайтын магистралдық маршрутизаторлардың баптау өзгерістері проблемаға ұшыратқанын және байланысты үзгенін анықтады. Желі трафигіндегі бұл ақау біздің деректерді өңдеу орталығының байланыс жолына сатылы әсер етіп, бұдан біздің қызметтер жұмыс істемей қалды», – делінген Facebook инженерлерінің сайтында.
Facebook қызметкерлері Facebook, Instagram және WhatsApp желілеріндегі ақауға байланысты пікір білдіре отырып, ақау кезінде қолданушылардың дерегін жария етуге жол берілмегеніне сендірді.
«Бізде ақау кезінде қолданушылардың деректеріне қауіп төнгені туралы ешқандай дәлел жоқ», – делінген Facebook сайтында.
Бұған дейін компания басшысы Марк Цукерберг ақау үшін кешірім сұрап, Facebook, Instagram, WhatsApp және Messenger қайтадан жұмыс істей бастағанын хабарлаған еді.