Сайқын стансасында астық тиеген жүк пойызы апатқа ұшырады
Батыс Қазақстан облысында астық тиелген бес вагон аударылып қалды, деп хабарлайды Basnews.kz ақпарат порталы.
БҚО Төтенше жағдайлар департаменті баспасөз қызметінің хабарлауынша, оқиға 7 наурыз күні сағат 23.20-да Бөкей ордасы ауданы Сайқын стансасында болған.
«Ресей темір жолдары» ААҚ Приволжье темір жолы филиалының 1219-шақырымында Саратов-Астрахан бағытында қатынайтын №10518 жүк пойызының бес вагоны жолдан шығып кеткен. Зардап шеккендер жоқ, делінген хабарламада.
Апатқа байланысты жолаушылар және жүк пойыздары басқа жолмен қатынайтын болады.
Апат салдарын жоюға «Ресей темір жолдары» ААҚ күштері (36 қызметкер мен Палласов пен Басқұншақ стансаларынан 2 қалпына келтіру пойыздары келді) жұмылдырылды.
Оқиға орнына БҚО ТЖ департаменті (4 қызметкер, 1 техника), аудандық полиция бөлімі (6 қызметкер, 3 техника), жергілікті атқарушы органдар (5 қызметкер, 2 техника) барды.
Айта кетейік, Ресей темір жолы Сайқын стансысының үстімен өтеді.
