Шымкенттің туристік әлеуетін ілгерілету жақсарып келеді
Бұл туралы Шымкент қаласы Туризм және сыртқы байланыстар басқармасының басшысы Ерлан Қыдыров баспасөз мәслихатында айтып өтті. Өңірдің туристік әлеуетін жарнамалауда келесі бағыттарда жұмыстар жүргізілуде.
Бірінші, жыл сайын қаланың көрікті жерлері туралы интерактивті альбом шығарылуда. Аталған жарнама құралы арқылы турист өңіріміздің туристік нысандары туралы ақпаратты бір кітапта арнайы бейнероликтер түрінде 3 тілде (қазақ, орыс және ағылшын) ала алады.
Екінші, өңірдің туристік өнімдерін ішкі және халықаралық нарықта ілгерілету мақсатында Нұр-Сұлтан мен Алматы қалаларында өткен қазақстандық халықаралық көрмелерде Шымкенттің арнайы стенді ұйымдастырылып, таныстыру жұмыстары жүргізілді. Нұр-Сұлтан қаласындағы көрмеде қала стенді «Ең үздік стенд дизайны», ал Алматы қаласында «Үздіктердің үздігі» номинацияларын жеңіп алды. Сондай-ақ Ақтау қаласында өңіраралық туристік бизнес өкілдерімен кездесу өтіп, Шымкенттің туристік әлеуеті туралы презентация жасалды.
Бұдан бөлек, Катар, Әзірбайжан, Грузия, Түркия мемлекеттерінде арнайы роуд-шоу ұйымдастырылып, Шымкенттің көрікті жерлерінің таныстырылымы өтіп, екіжақты келіссөздер мен бауырластық және серіктестік байланыс орнату, ынтымақтастық туралы келісімдерге қол жеткізілді.
Үшінші, қаланың танымалдығын арттырып, туристерді тарту мақсатында әлеуметтік желілер арқылы «Бақытты қалаға саяхат» конкурсы 5 рет ұйымдастырылды. Оның ішінде екі жеңімпаз еліміздің Ақтау және Нұр-Сұлтан қалаларының тұрғындары, сондай-ақ 1 жеңімпаз Катар мемлекетінің азаматы қалаға келіп, арнайы экскурсиялық бағдарламаға қатысып, өңірдің туристік нысандарымен танысса, 2 жеңімпаз Баку және Алматы қалаларының тұрғындары қыркүйек айында Шымкентке келетін болады.
Төртінші, Мемлекет басшысы Қ.К. Тоқаев өскелең ұрпаққа жол ашу үшін барлық жағдайды жасау қажеттігін айта келе, 2022 жылды балалар жылы деп жариялады. Осы мақсатта «Visit Shymkent» орталығының ұйымдастыруымен ағымдағы жылдың қаңтар-маусым айларында балаларға арналған 50 туристік экскурсия ұйымдастырылып, оған жалпы саны – 2 500 мектеп оқушысы қатысты.
Бүгінгі таңда Шымкент Нұр-Сұлтан және Алматы қалаларымен қатар Қазақстанның МІСЕ туризмінің орталықтарының бірі болуға барлық алғышарттарға ие. Оған қаланың ыңғайлы географиялық орналасуы, әртүрлі бағыттағы іс-шараларды өткізуге қолайлы инфрақұрылымы, ивент және жарнамалық агенттіктердің болуы жағымды әсер етеді.
