30 наурыздан 5 сәуірге дейін Нұр-Сұлтанда автобустар жүрмейді

Нұр-Сұлтан қаласының әкімі Алтай Көлгінов тұрғындарға үндеу жолдады, деп хабарлайды Basnews.kz.
«Құрметті қала тұрғындары! Өздеріңіз білетіндей, коронавирус тез тарап, ауырған адамдардың саны артып келеді. Өкінішке қарай, адам шығыны да бар. Індет кесірінен қаза болған кісінің отбасына көңіл айтамыз. Дәрігерлер қолынан келгеннің бәрін жасады. Біз бұл қауіпті тәртіп пен қатаң шараларсыз еңсере алмаймыз», – дейді елорда әкімі.
Шаһар басшысының сөзіне сенсек, 30 наурыз бен 5 сәуір аралығында қоғамдық көлік тоқтайды. Автопарк жұмысшыларының денсаулығы тексеріледі.
Оның айтуынша, 25 наурыздан бастап зейнеткерлердің, диспансерлік есепте тұрған азаматтардың үйлеріне дәрі-дәрмек, қорғаныс құралдарын және азық-түлікті тасымалдау жұмысы жүргізілуде. Өтініш iKomek 109 қызметі арқылы қабылданып жатыр.