Шымкентте құқық қорғау қызметкерлері қарасора өсіретін фитолабораторияны жойды

«Қарасора» есірткіге қарсы іс-шарасы барысында жедел ақпаратты пысықтау нәтижесінде полиция департаментінің Есірткі қылмысына қарсы күрес басқармасы қалалық ҰҚКД-нің қызметкерлерімен бірлесіп құрамында есірткі бар өсімдікті өсіретін фитолабораторияны анықтады. 

Еңбекші ауданындағы тұрғынның қосалқы үйінен құмыраларға отырғызылған 19 түп қарасора табылып, тәркіленді. 38 жастағы ер адам гидропоника әдісімен тыйым салынған өсімдіктерді баптап өсіруге жағдай жасап, бөлмені желдету жүйесімен және қолдан жасалған шамдармен жабдықтаған.

Сондай-ақ, тәртіп сақшылары сарайдың төбесінен де заңсыз егіп-өсіру дерегін анықтады. Мұнда есірткі өсіруші 17 пластик шелекке ірі қарасора өсірген. Тәркіленген өсімдіктердің жалпы салмағы шамамен 14 кг құрады.

Аталған жайтқа қатысты , тергеушілер ҚР Қылмыстық кодексінің 300-бабы 2-бөлігі бойынша сотқа дейінгі тергеу амалдарын бастады.

Айта кетейік, есірткі заттары бар өсімдіктерді ірі көлемде егіп, өсіргені үшін күдікті үш жылдан сегіз жылға дейінгі мерзімге бас бостандығынан айырылуы мүмкін.

Шымкент тұрғыны қарасора өсіріп, қорада есірткі салынған қаптарды сақтаған. Абай АПБ-ның учаскелік инспекторлары әкімшілік аумақта рейд жүргізу кезінде құрамында есірткі заттары бар өсімдіктерді өсіру дерегін анықтады. 48 жастағы жергілікті тұрғынның бақшасынан тәртіп сақшылары қарасора бұталарын тауып, тәркіледі.

Сонымен қатар, үйдің жанындағы мал қорасын тексеру кезінде скотчпен оралған, 2 үлкен қап марихуана табылды. Құрамында есірткі бар кептірілген өсімдіктердің жалпы салмағы 20 келі болды.

Ер адам ҚР ҚК-нің 297-бабы 3-бөлігі «аса ірі мөлшердегі есірткі заттарын заңсыз сақтау» және 300-бабы 1-бөлігі «Өсiруге тыйым салынған өсiмдiктердi егу немесе өсiру, сораның, көкнәрдiң немесе құрамында есiрткi заттар бар басқа да өсiмдiктердiң сұрыптарын егіп-өсіру» бойынша қылмыстық құқық бұзушылықтарды жасағаны үшін күдікті деп танылды.

Қазіргі таңда ол уақытша ұстау изоляторына қамалды. Сотқа дейінгі тергеу амалдары жүргізілуде. Полицейлер есірткіге қатысты кез-келген заңсыздыққа жол бермеу туралы ескертеді. Есірткі заттарының заңсыз айналымы қоғамға үлкен қауіп төндіреді және қолданыстағы заңнамаға сәйкес қатаң жауапкершілікке тартылады.