Сайрамда «Таза бейсенбі» апталығы аясында орталық саябақ аумағы тазаланды

Қоршаған ортаны таза ұстап, қорғау – барша адамзаттың азаматтық парызы. Мемлекет басшысының «Таза Қазақстан» жалпыұлттық бастамасы аясында «AMANAT» партиясы «Таза бейсенбі» экологиялық акциясын  әр бейсенбі сайын ұйымдастырып келеді.

Бүгін «АМАNAT» партиясы Сайрам аудандық филиалының партия белсенділері, Манкент ауылдық округі әкімінің орынбасары Сиддиков Шавкат және әкімдік қызметкерлерінің  қатысуымен «Таза бейсенбі» республикалық экологиялық акциясы өткізілді.

Тазалау жұмыстарына бірқатар күл-қоқыс тазалайтын жүк көліктер жұмылдырылып, Манкент ауылдық округіндегі Орталық саябақ пен  қоғамдық орындары ретке келтірілді.

Атап айтқанда, 50-ге жуық бағана сырланып, 200-ге жуық ағаш түптері әктелді. Тазалық науқанына қатысқан 50-ден аса қызметкер тұрғындардың тынығуына қолайлы жағдай қалыптастыруға атсалысты. Сондай-ақ 1,5 тонна қоқыс  шығарылды. Бұл  жұмыстар аумақтарды, өзен-көлдердің жағалауын, аудан көшелерін көгалдандыруға өзіндік үлесін қосатыны анық.

Айта кетсек, Мемлекет басшысы Қасым-Жомарт Тоқаев барша қазақстандықтарды ауқымды экологиялық жобаға белсенді қатысуға шақырды. Ауқымды экологиялық науқан республикада бес аптаға созылады. Осы уақыт ішінде акцияға қатысушылар жасыл желектерді ретке келтіріп, өзен жағасын қоқыстан тазартады.