Адамзаттың Абайы: руханият, парасат, таным
Семей қаласы Шәкәрім Құдайбердіұлы атындағы университетте ұлы ақын, ағартушы, гуманист Абай Құнанбайұлының 180 жылдығына арналған халықаралық ғылыми-тәжірибелік конференция өтті. Шараны ҚР Ғылым және жоғары білім министрлігі, Абай облысының әкімдігі, Шәкәрім университеті және Абайдың «Жидебай-Бөрілі» қорық-музейі ұйымдастырды.
Конференцияның мақсаты – Абайдың рухани мұрасын заманауи тұрғыдан зерделеу, оның «толық адам» ілімінің ұлттық сана мен тәрбие жүйесіндегі орнын айқындау болды.
Шарада гуманизм, руханият және мәдени-философиялық мәселелер талқыланып, жас зерттеушілерге тәжірибе алмасу мүмкіндігі ұсынылды.
Қазақстан, Түркия, Нидерланды, Ресей және басқа да елдерден келген әдебиеттанушылар, философтар, тіл мамандары мен абайтанушылар Абай шығармашылығының қазіргі қоғамдағы маңызына тоқталды.
