Түркістан облысында энергетика және коммуналдық секторларды жаңғырту ұлттық жобасын жүзеге асыру үшін 2025-2029 жылдары аралығында жалпы құны 164 миллион теңгеге жуық инвестиция тарту жоспарланған. Бұл туралы ҚР ҰЭМ Табиғи монополияларды реттеу комитетінің Түркістан облысы бойынша департаментінің басшысы Ақтілеу Бекмұратов баяндады.
«Жаңғырту жұмыстары төрт жыл бойы кезең-кезеңмен жүзеге асырылады. Инфрақұрылымдық жүйелерді жаңалау мақсатында инвесторлар есебінен жылумен жабдықтауға — 20,08 млн теңге, электр желілері үшін — 100,8 млн теңге, су жүйелеріне — 34,5 млн теңге, кәріз жүйелеріне — 8,4 млн теңге тарту жоспарланған. Қазіргі таңда өңірдегі электр желілерінің 57 пайызының тозығы жеткен. Ұлттық жобаны жүзеге асыру нәтижесінде 2029 жылға қарай желілердің тозу деңгейін 53,5%-ға дейін азайту жоспарлануда. Бағдарлама аясында қолданыстағы нысандарды жаңғырту және энергия секторында тиімді және қауіпсіз жұмыс істеу үшін заманауи технологияларды қолданысқа енгізу көзделіп отыр. Ал, Леңгір қаласындағы «Леңгір Су» мекемесінде ауыз су жүйелерінің 64% тозған. Ұлттық жобаны жүзеге асыру нәтижесінде 2029 жылға қарай желілердің тозу деңгейін 50%-ға дейін азайту жоспарлануда. Облыс орталығындағы кәріз жүйелерін ретке келтіру бойынша шаһарда 60 пайыз тозығы жеткен жүйелерді 40 пайызға дейін азайтуға болады. Аталған жоба аясында кәріз жүйесіне арналған қаржыландыру көлемі 1 млрд 716 млн теңге»-деді спикер.
Түркістан облысының Өңірлік коммуникациялар қызметі
