Жезқазғанда әлеуметтік қорғау саласы қызметкерлерінің кәсіби мерекесіне арналған салтанатты жиын өтті
Жезқазған қаласында Әлеуметтік қорғау жүйесі қызметкерлерінің күніне арналған кең ауқымды салтанатты іс-шара өтті. Мерекелік жиын Жезқазған қаласы әкімдігінің ұйымдастыруымен өткізіліп, әлеуметтік сала мамандарына құрмет көрсетуге арналды. Бұл күн дәстүр бойынша қазан айының соңғы жексенбісінде аталып өтіп, халықтың әл-ауқаты мен өмір сапасын жақсарту жолында қажырлы еңбек етіп жүрген мамандардың еңбегін бағалау мен марапаттауға бағытталған маңызды дата болып табылады.
Іс-шара барысында Жезқазған қаласының әкімі Қайрат Абдоллаұлы Шайжанов әлеуметтік қорғау жүйесінің қызметкерлерін кәсіби мерекелерімен шын жүректен құттықтап, олардың қоғам алдындағы ерекше рөлін атап өтті. Әкім өз сөзінде әлеуметтік сала қызметкерлері күн сайын азаматтардың мұң-мұқтажына құлақ асып, өмірлік қиын жағдайға тап болған жандарға көмек көрсету арқылы елдің әлеуметтік тұрақтылығына зор үлес қосып келе жатқанын ерекше атап өтті. Сондай-ақ, ол барша әлеуметтік сала мамандарына қажымас қайрат, кәсіби табыс және отбасылық амандық тіледі.
Мерекелік жиында Ұлытау облысы әкімінің және Жезқазған қаласы әкімінің Құрмет грамоталары мен алғыс хаттары табысталып, өз ісіне адалдық танытқан, көп жылдық еңбегімен ерекшеленген үздік қызметкерлер марапатталды. Сонымен қатар, жоғары кәсіби шеберлік пен азаматтарға көрсеткен қамқорлығы үшін бірқатар мамандарға 100 000 теңге көлеміндегі сертификаттар берілді.
Салтанатты іс-шараға қалалық мәслихат төрайымы Раушан Оңқонысқызы Қапарова қатысып, әлеуметтік сала қызметкерлеріне ізгі тілегін жеткізді. Ол өз сөзінде әлеуметтік қорғау жүйесінде еңбек ететін мамандардың кәсіби шеберлігі мен мейірімділікке негізделген еңбегі қоғам үшін аса құнды екенін атап өтті.
Сонымен қатар, «Қызмет» салалық кәсіподағының Ұлытау облыстық филиалының төрайымы Раушан Құрмашқызы Қожабаева да сөз алып, қатысушыларды кәсіби мерекемен құттықтады. Ол әлеуметтік қорғау жүйесінде көп жылдар бойы абыроймен еңбек етіп келе жатқан қызметкерлерге алғысын білдіріп, кәсіподақ қозғалысын дамытуға қосқан үлесі үшін бірқатар мамандарды «Кәсіподақ қайраткері» медалімен және «Еңбек үздігі» төсбелгісімен марапаттады.
Бұл салтанатты жиын әлеуметтік сала қызметкерлеріне деген зор құрметтің айқын көрінісіне айналды. Осындай шаралар қоғамда әлеуметтік жауапкершілікті арттырумен қатар, өз ісіне адал мамандардың еңбегін дәріптеуге, жаңа кәсіби жетістіктерге ынталандыруға септігін тигізеді. Әлеуметтік қорғау жүйесінің қызметкерлері халықтың сенімін ақтап, әрбір азаматтың өмірінде жақсылық пен қолдау дәнін себуде маңызды миссия атқарып келеді.
