Ұлытау өңірінде 127 референдум учаскесі іске кірісті

Ұлытау облысында республикалық референдум аясында 127 учаскелік референдум комиссиясы өз жұмысын бастады. Жалпы өңірде референдумды өткізу үшін 6 аумақтық және 127 учаскелік комиссия қызмет атқаруда. Комиссиялардың құрамында барлығы 845 адам бар, оның ішінде 42-сі аумақтық, 803-і учаскелік комиссия мүшелері.

Ұлытау облысы бойынша дауыс беру тізіміне 136 447 азамат енгізілген.

Референдум учаскелерінде дауыс беру сағат 07:00-ден 20:00-ге дейін жүргізіледі. Ал Жәйрем кентіндегі 6 учаскеде тау-кен байыту комбинаты қызметкерлерінің ауысымдық жұмыс кестесіне байланысты дауыс беру уақыты 06:00-ден 20:00-ге дейін белгіленген.

Сайлаушыларға қолайлы жағдай жасау мақсатында облыс қалаларындағы 57 учаскеде азаматтарды сайлаушылар тізімінен тексеруге арналған онлайн-сервистер, ал 6 учаскеде азаматтарды тіркеу сервистері орнатылған.

Сонымен қатар референдум кезінде мүгедектігі бар азаматтардың дауыс беруіне барлық қажетті жағдай жасалған. Барлық учаскелер пандустармен және арнайы тұтқалармен жабдықталған. Кресло-арба пайдаланатын азаматтарға волонтерлар көмегі көрсетіледі, сондай-ақ облыс бойынша 7 инватакси қызметі жұмыс істейді.