Ұлытауда электрмен жабдықтау жүйесі жаңғыртылуда
Ұлытау облысының Жаңаарқа ауданында ұзақ жылдан бері қордаланып келе жатқан электр қуаты мәселесі кезең-кезеңімен шешілуде. Бұл бағыттағы ауқымды жаңарту жұмыстары 2026 жылға дейін жалғасатын күрделі жобаның аясында жүзеге асырылып жатыр.
Жобаны жүзеге асыру міндеті «УниверсалСтройСервис» жауапкершілігі шектеулі серіктестігіне жүктелген. Құрылыс-монтаж жұмыстары Жаңаарқа кенті мен Ераліев ауылын қамтиды.
Аталған жұмыстар аясында электр тіректерін жаңалау, тозығы жеткен желілерді толықтай ауыстырып, жаңадан тарту қарастырылған. Бұл – тұрғындарды сапалы әрі үздіксіз электр қуатымен қамтамасыз етуге бағытталған маңызды қадам.
Қазіргі таңда 1200 дана электр тірегі жеткізіліп, оның 350-і орнатылып үлгерді. Сонымен қатар, жоба бойынша жалпы саны 28 қосалқы станса орнату жоспарланған. 2025 жылдың өзінде соның 7-еуі жаңасына ауыстырылады.