Сайлау: Дауыс беру күні қандай санитарлық талаптар сақталуы керек
ҚР Денсаулық сақтау вице-министрі – ҚР Бас мемлекеттік санитар дәрігері Ерлан Қиясов сайлау кезіндегі санитарлық нормаларды сақтау ережелерін түсіндірді, деп хабарлайды BasNews,kz.
Бас санитардың айтуынша, халық арасында COVID-19 инфекциясының алдын алу мақсатында дауыс беру күні сайлау процесінің барлық қатысушылары мына талаптарды орындауы тиіс:
1) сайлау учаскесіне келгенде бір реттік медициналық немесе қорғаныс маскалары мен қолғаптарын кию;
2) қолды тазарту үшін сайлау учаскелерінде орнатылған антисептикалық санитайзерлерді пайдалану;
3) Адамдар арасында ең кемі 1,5-2 метр әлеуметтік қашықтықты сақтау;
4) қол алысудан немесе тікелей байланыстың басқа түрлерінен аулақ болу;
5) жеке қаламсапты пайдалану.
«COVID-19 таралу қарқыны бойынша «қызыл» және «сары» аумақта орналасқан өңірлерде сайлау комиссияларының барлық мүшелері және байқаушылар 5 тәуліктен ерте емес мерзімде ПТР-тест әдісімен зертханалық тексеруден өтуі тиіс. Зертханалық тексерудің оң нәтижесі бар адамдар сайлау учаскесіне кіргізілмейді», – дейді Ерлан Қиясов.
Өңірдегі эпидемиологиялық жағдайға қарай дауыс беру күні сайлау процесіне қатысушылар өңірдегі бас санитар дәрігер белгілеген қауіпсіздік шараларын қамтамасыз ету жөніндегі талаптарды сақтауы тиіс.
