Сенатта ішкі істер органдарын жаңғыртудың Жол картасы қаралды

Қазақстан Республикасы Парламенті Сенатының Конституциялық заңнама, сот жүйесі және құқық қорғау органдары комитеті мен Халықаралық қатынастар, қорғаныс және қауіпсіздік комитетінің мүшелері Ішкі істер органдарын жаңғырту жөніндегі 2019-2021 жылдарға арналған жол картасын іске асыру мәселелері бойынша үкімет сағатын өткізді. Бұл туралы Жоғарғы палатаның баспасөз қызметі хабарлайды.

Шараға Сенат депутаттары мен Ішкі істер министрлігінің басшылығы және ішкі істер жүйесіндегі құқық қорғау мекемелерінің өкілдері қатысты.

Ішкі істер министрі Ерлан Тұрғымбаев сенаторларды құқық қорғау органдарын реформалау жұмыстарының барысымен таныстырды. Оның айтуынша, Елбасының тапсырмасына сәйкес әзірленген 2019-2021 жылдарға арналған бағдарлама нәтижесін беруде. «Алғашқы кезеңде полицейлердің саны 11 процентке қысқартылды. Қылмыстың алдын алу шараларын күшейту үшін қызметкерлер мектеп, көше, қоғамдық орындарға жіберілді. Ішкі істер министрлігі және оның мекемелерінің қызметтік міндеттеріне талдау жасалды, олардың қорытындысы бойынша  артық 106 басқару буындары және 1 483 басшылық лауазымдар таратылды. ІІМ қызметкерелері саны 11 процентке кеміді, яғни 10 592 қызметкер қысқартылды», – деді Е.Тұрғымбаев.

Министрлікте жүргізілген реформалаудың нәтижесінде 16 млрд теңгеге жуық бюджет қаржысы үнемделген. 

Конституциялық заңнама, сот жүйесі және құқық қорғау органдары комитетінің төрағасы Владимир Волков Ішкі істер министрлігі сыбайлас жемқорлық ісі жиі қозғалатын 5 мемлекеттік органдардың қатарында екенін айтты.

«Соңғы 3 жыл ішінде ішкі істер органдарының қызметкерлері 1846 қылмыс жасалған. Оның ішінде 1051-і сыбайлас жемқорлыққа байланысты болып отыр. Нәтижесінде 1066 қызметкер қылмыстық жауапқа тартылған», – деді В.Волков.

Халықаралық қатынастар, қорғаныс және қауіпсіздік комитетінің төрағасы Мұхтар Құл- Мұхаммед еліміздегі заңгер мамандарды даярлау ісі сын көтермейтініне тоқталды.

«Бұрын заңгер мамандығын даярлайтын оқу орындары санаулы болатын. Тәуелсіздік алған соң еліміздің барлық өңіріндегі жоғары оқу орындарында заңгер мамандығын даярлайтын факультеттер ашыла бастады. Олардың маман даярлау сапасының нашар екенін бәріміз де білеміз. Соның салдарынан қазіргі уақытта әлеуметтанушылардың зерттеуі бойынша Қазақстанда жұмыссыз мамандардың қатарында заңгерлер көш бастап тұр», – деді М.Құл-Мұхаммед.

Сенат депутаттары ішкі істер органдарының жұмысын жаңғырту мақсатына бағытталған 11 нақты ұсыныс әзірледі. Оның ішінде Төтенше жағдайлар комитетін министрліктен бөлек орган ретінде құру, Ішкі істер министрлігінің аумақтық бөлішелерін қайта жасақтауды жалғастыру, полицей учаскелерін материалдық құрал-жабдықтармен қамтамасыз ету және сотталушыларға көрсетілетін медициналық қызмет түрін Денсаулық сақтау министрлігінің құзырына беру мәселесін қарастыру.

Сондай-ақ, сенаторлар қоғамдық қауіпсіздікті қамтамасыз ету жұмысын оңтайландыру мақсатында ІІМ жанынан ақпараттық-талдау орталығын құруды қарастыру, халықтың құқық қорғау органдарына деген сенімін арттыруға бағытталған шараларды жүзеге асыру мен ІІМ-нің сайты арқылы азаматтардың орган жұмысына онлайн түрде баға беру мүмкіндігін ұйымдастыру, кадр даярлаудың тиімділігін оңтайландыру ұсынылды.

Одан бөлек, ішкі істер органдарындағы бос қызметке байқау кезінде бақылаушылардың ой-пікірін ескеру керектігі, сол сияқты Бас прокуратура мен құқықтық статистика жөніндегі комитетпен бірлесіп қылмыс жиі орын алатын елді мекендерде патруль шығару кестесін әзірлеу керектігі сөз болды.

Конституциялық заңнама, сот жүйесі және құқық қорғау органдары комитетінің төрағасы Владимир Волков отырысты қорытындылай келіп, әзірленген ұсыныстар ішкі істер органдарының қызметін жетілдіруге бағытталғанын еске салды. «Біз сіздердің жұмыстарыңызды сынамаймыз. Біз тек ұсыныс жасаймыз.», – деді В. Волков.