Алматыда троллейбус жерасты өткеліне соғылып, 7 адам зардап шекті
Алматыда троллейбус жерасты өткелініне соғылып, жеті адам зардап шекті, – деп хабарлайды Basnews.kz тілшісі.
Болған оқиғаның видеосы мен суреттерін қазақстандықтар әлеуметтік желілерде жариялап жатыр.
«Алматыэлектротранс» ЖШС мәліметінше, жол апаты 21 тамызда сағат шамамен 14.50-де Байзақов көшесінен кейін тұрған батыс бағыттағы Абай даңғылында болған.
«Троллейбус жүргізушісі өзін нараш сезініп, көлікті басқара алмай жерасты өткелінің қабырғасына соғылды. Аталған дерек ПД-да тіркелді, тексеру жүріп жатыр», – деп хабарлады «Алматыэлектротранс» өкілі.
Апаттан балалар да зардап шекті. Ольга Бражникова Facebook-те екі немересі жарақат алғанын жазды.
«6 жасар қыздың кеудесі көгерген, ерні жыртылған, кішісінің мұрны сынды. Жедел жәрдем күтпедік», – деп жазды Алматы тұрғыны.
Алматы ПД мәліметінше, оқиға салдарынан троллейбустың жеті жолаушысы зардап шекті, олар қаланың түрлі медициналық мекемесіне жеткізілді.
