BasNewsЖаңалықтар
Таразда қараусыз қалған ғимараттан қару табылды
Таразда қараусыз қалған ғимараттан бірнеше қару табылды, – деп хабарлайды Basnews.kz тілшісі Polisia.kz сайтына сілтеме жасап.
1 ақпанда Тараз қаласы полиция басқармасының қызметкерлері жедел-іздестіру жұмыстарын жүргізу барысында қала аумағындағы қараусыз қалған ғимараттардың бірінде атыс қарулары жасырылғанын анықтады.
«Калашников маркалы бір автомат, Streamer маркалы бір травматикалық тапанша, бір дана оқжатар мен бір жарық-шулы граната тәркіленді. Анықталған қару-жарақтарға қатысты сот-баллистикалық сараптама тағайындалды», – деп хабарлады Тараз қалалық полиция басқармасының бастығы Асылхан Заурбеков.
Тараз қалалық полиция басқармасы қарудың, оқ-дәрілердің, арнайы құралдардың орны туралы хабарлаған немесе оларды полицияға өз еркімен тапсырған адам қылмыстық және әкімшілік жауапкершілікке тартылмайтынын еске салды.
