Қазақтарды эвакуациялау: жолаушылар отырған автобус Польша шекарасын кесіп өтті

Қазақстандықтарды Украинадан эвакуациялау сәті түсірілген кадрлар пайда болды. Бір күн бұрын ондаған жолаушысы бар алғашқы автобус Польша шекарасын кесіп өтті, – деп хабарлайды BasNews.kz тілшісі.

24kz-ның мәліметінше, «Корчева-Краковец» бақылау-өткізу бекетіндегі көп шақырымдық көлік кептелісіне байланысты азаматтарымызды отанына қайтару операциясы күткендей жылдам жүріп жатқан жоқ, бірақ дипломаттар отандастарымыздың елге аман-есен жетуі үшін қолдан келгеннің бәрін жасауда.

«Бір күн бұрын Катовице әуежайынан алғашқы рейсі ұшып, Атырауға техникалық қонғаннан кейін Алматыға келеді деп хабарланған болатын. Дегенмен, оқиға орнындағы жағдай әр минут сайын өзгеріп отыр. Біз Сыртқы істер министрлігінен расталған ақпаратты күтеміз. Алдағы уақытта басқа да рейстер ұйымдастырылады», – дейді Сыртқы істер министрлігінің ресми өкілі Айбек Смадияров.

Оның айтуынша, эвакуацияға көмектесу үшін 500-ден астам өтініш түскен.