Төтенше жағдай кезінде той жасаған Түркістан тұрғынына айыппұл салынды
Түркістан қаласының мамандандырылған әкімшілік соты өз үйінің ауласында той жасаған азаматқа қатысты шешім шығарды, деп хабарлайды BasNews.kz.
Облыстық соттың мәліметінше, аталған азаматқа қатысты әкімшілік іс ҚР ӘҚБтК 476-бабының 3-бөлігімен қаралған.
«Сотта М. өз кінәсін толық мойындап, істеген ісіне өкінетінін айтқан. Соттың қаулысымен М. Қазақстан Республикасы Әкімшілік құқық бұзу туралы кодексінің 476-бабы 3-бөлігінде көрсетілген құқық бұзушылықты жасағаны үшін кінәлі деп танылып, оған 26 510 теңге айыппұл салынды. Сот қаулысы заңды күшіне енбеген» делінген соттың Facebook әлеуметтік желісіндегі парақшада.
Еске сала кетейік, кеше Түркістан облысында төтенше жағдай кезінде той жасаған тұрғынға әкімшілік хаттама толтырылған болатын.
Облыстық ПД баспасөз қызметінің мәліметінше, той жасаған тұрғын ҚР Президенті Қасым-Жомарт Тоқаевтың елімізде төтенше жағдай енгізу туралы қаулысын ескермеген. Оның той жасағаны туралы бейнежазба әлеуметтік желілер мен мессенджерлерде тараған.
Аталған жайт бойынша Түркістан қалалық полиция басқармасының қызметкерлері шұғыл іздестіру шараларын атқарып, тойдың Түркістан қаласындағы мөлтек аудандардың бірінде өткенін анықтаған.
