Шымкент полицейлері екі жыл бұрынғы адам өлтіру жайтын ашты
2021 жылы Еңбекші ауданының полиция басқармасына 32 жастағы ұлының жоғалып кеткені туралы жергілікті тұрғын хабарласты. Анасы ер адамның екі апта бұрын үйден шығып, қайтып оралмағанын айтты. Хабар-ошарсыз кеткен азаматтың жүрген жерін анықтау мақсатында криминалдық полиция қызметкерлері кешенді шаралар жүргізді.
Тәртіп сақшылары оның отбасы мүшелерінен, көршілерінен, достарынан сауалнама жүргізіп, жақын маңдағы бейнебақылау камераларының жазбаларын тексерді. Ер адамның сыртқы келбетін сипаттайтын бағдарлар қалалық полиция департаментінің басқармаларына, сондай-ақ еліміздің барлық аймақтарындағы полиция бөлімдеріне жолданды.
2 жыл бойы іздестіру жұмыстары нәтижесіз болғанымен, биылғы жылдың басында жедел қызметкерлер жайт бойынша ілмек таба алды. Кездейсоқ куәгердің жауабына сәйкес, азаматтың жоғалып кетуіне інісінің қатысы бар болған. Қабылданған шаралар нәтижесінде, отбасылық жанжал барысында ол туысын басынан арматурамен бірнеше рет ұрып, өлтіргені анықталды. Бұл іске ол өгей ағасының мас күйінде анасымен жанжалдасатыны итермелеген.
Аса ауыр қылмыстың ізін жасыру үшін қаскүнем мәйітті сырттағы дәретханаға тастап, шұңқырды бетонмен толтырып, үстіне шағын сарай тұрғызған. Күдікті қамауға алынды. Еңбекші АПБ-ның тергеушілері қылмыстық істі айыптау актісімен сотқа жолдады.
Шымкентте жол ережесін бұзған бейнежазбаның кейіпкерлері жазаланды. Әлеуметтік желілерге мониторинг жүргізу кезінде қалалық полиция департаментінің қызметкерлері бірнеше шетелдік көліктердің қатысуымен жолдағы «дойбы ойыны» түсірілген бейнежазбаны анықтады.
Көлік жүргізушілері қозғалыс кезінде бірнеше рет жолақты ауыстырып, қауіпсіз қашықтықты сақтамай, бірін-бірі басып озып төтенше жағдай туғызған. Тізгіндеушілердің орынсыз қылығына ашуланған өзге де жол қозғалысына қатысушылар не болып жатқанын видеоға түсіріп алған.
Патрульдік полиция полкінің инспекторлары қабылданған шаралардың нәтижесінде құқық бұзушылар анықталды. Жол ережесін өрескел бұзған азаматтар ҚР ӘҚБтК-нің 595- бабы «маневр жасау қағидаларын бұзу» және 606-бабы «жол жүрісіне ЖЖҚ авариялық жағдай туғызуға әкеп соққан бұзушылығы»бойынша жауапкершілікке тартылды.