Шығыс Қазақстанда Ассамблеяның ХХХ сессиясы өтті
Облыс орталығында «Бірлік. Жасампаздық. Өрлеу» тақырыбында Қазақстан Халқы Ассамблеясының ХХХ сессиясы өтті. Атаулы жиында Қазақстан халқы Ассамблеясы төрағасының орынбасары, Ассамблея хатшылығының меңгерушісі Марат Әзілханов пен Шығыс Қазақстан облысының әкімі Ермек Көшербаев бой көрсетті.
– Мемлекет басшысы Қасым-Жомарт Кемелұлы Тоқаев Қазақстан халқы Ассамблеясының «Бірлік. Жасампаздық. Өрлеу» атты сессиясында нақты міндеттерді белгілеп берді. Президентіміз атап өткен, тәуелсіздік және отансүйгіштік, бірлік пен ынтымақ, әділдік пен жауапкершілік, заң мен тәртіп, еңбекқорлық пен кәсібилік, жасампаздық пен жаңашылдық барша қазақстандықтарға ортақ құндылықтар. Ассамблея – жалпыұлттық бірегейлікті нығайтуда маңызды рөл атқарады. Әлемде баламасы жоқ, конституциялық мәртебесі бар бірегей құрылым еліміздегі барша этносты бір шаңырақ астында біріктіріп отыр, – деді аймақ басшысы Ермек Көшербаев.
Соңғы екі жылда Достық үйлері әтномәдени бірлестіктердің ғана емес, сонымен қатар жергілікті қауымдастықтардың, үкіметтік емес ұйымдар мен жастардың «тартымды орнына» айналғаны байқалуда. Бүгінде аталған Достық үйлерінің тұғырын нығайту мақсатында ауқымды жұмыстар атқарылу үстінде. Атап айтқанда, жалақы мөлшерін көтеруге, іс-шаралар ұйымдастыруға арналған техникалық базамен қамтамасыз етуге қаражат бөлінді.
– Шығыс Қазақстан нағыз достық пен келісімнің қадірін білетін бірде-бір аймақ. Оған дәлел, Шығыс Қазақстан облысы ҚХА мүшелерінің су тасқынынан зардап шеккен аймақтарға гуманитарлық көмек жинауға белсе қатысуы. Бірғана ассамблея арқылы облыс 140 тонннадан астам жүк жөнелтті. Өңірде қолдау мен кеңейтуді қажет ететін бірегей жобалар мен идеялар аз емес. Олардың қатарында Достық үйіндегі медиация кабинеттері, мектептегі КХА, «Қонақжай отбасы» жобасы бар. Шығыста 8 Достық үйі бар, бұл елде жоқ көрсеткіш, баға жетпес байлық, жалпыұлттық бірегейліктің дәлелі, – деді Қазақстан халқы Ассамблеясының төрағасының орынбасары Марат Әзілханов.
Сессияға қатысушылардың пікірінше, қоғамдық бірлестіктер мен ҮЕҰ жұмысы Ассамблеяның институционалдық әлеуетін нығайтуға, қоғамдағы келісім мен бірлікті және патриотизмді қалыптастыруға ықпал етуі тиіс. Достық үйлері бүгінде оқу-тәрбие, мәдени-ағарту үдерістеріне қатысады. Облыста тіл үйренуге арналған 25 үйірме жұмыс істеуде. Қазақ тілін тегін оқытатын 100 орталық ашу жоспарлануда. Өңірдегі мектептерде еркін әңгемлесу форматында КХА мүшелерімен балаларды көпұлтты Қазақстанның мәдениетімен, дәстүр-құндылықтарымен таныстыратын курстарды ашу жоспарда бар.
Өңірдің бірлігі мен ынтымағын сақтау, мен дамытуға үлес қосқан жандарға және іс-шараның өтуіне белсене атсалысқан облыс тұрғындарына Қазақстан халқы Ассамблеясының «Алғыс» төсбелгілері мен Алғыс хаттары табыс етілді.
Сондай-ақ аймақ басшысы Ермек Көшербаевтың тапсырмасымен сатып алынған жаңа шағын автобустың кілті Ассамблеяның Шығыс Қазақстан облысындағы өкілдеріне табыс етілді.