Өскемен қаласында көктемгі сенбіліктер маусымы басталды

 «Таза Қазақстан» акциясы аясында өткен алғашқы сенбілік «Көктем әуені» деген әдемі атауға ие болды. Бұл игі шараға қаладағы жастар ұйымдары, волонтерлер мен эко-белсенділер белсенді түрде атсалысты.

Шара барысында қатысушылар Өскеменнің орталық көшелерін, саябақтарды, қоғамдық орындарды қоқыстан тазартты. Қыс бойы жиналған қалдықтар қар еріген соң көзге бірден түсетіні белгілі, сондықтан қазіргідей уақытта тазалық жұмыстарының маңызы зор.

Экологиялық даму орталығының өкілдері қала тұрғындарын әр күн сайын ұйымдастырылатын сенбіліктерге белсене қатысуға шақырды. Олар әр адамның туған жеріне деген жауапкершілігін арттырып, табиғатты аялау мәдениетін қалыптастыру керектігін атап өтті. Қар толық еріп, жер кебе бастаған сәтте аулалар мен көшелерді тазарту – әрбір тұрғынның азаматтық парызы.

Шараға қатысқан колледж оқытушысы Әділ Тұрғанбаев та өз ойымен бөлісті:

— Жалпы, адам баласы жүрген жерінен бастап, киген киімінен бастап, таза болуы керек қой. Сондықтан жүрген жерімізді, жұмыс істейтін орнымызды, үйдің маңайын — бәрін таза ұстау деген өте керемет дүние. Бұл да бір дамып келе жатқан Қазақстанымызға қосқан үлес деп есептеймін, — деді ол.

Ұйымдастырушылар алдағы уақытта осындай сенбіліктерді жүйелі түрде өткізуді жоспарлап отыр. Әрбір кәсіпорын, мекеме, оқу орындары өз аумақтарын таза ұстауға міндеттеледі. Бұл бастама Өскеменнің экологиялық жағдайын жақсартуға және қала тұрғындарының табиғатқа деген сүйіспеншілігін арттыруға бағытталған.

Экологтар тұрғындарды тек сенбілік күндері ғана емес, күнделікті өмірде де қоршаған ортаны қорғауға және көшелерді ластамауға шақырады. Себебі әр адамның жасаған кішкентай қайырлы ісі — жалпы қоғамның үлкен жетістігіне айналады.