Түрік асханасы апталығы 2025: дәстүрлі тағамдар назарда

2025 жылғы апталықтың басты тақырыбы — «Түрік тағамдарының классикалық түрлері».

21–27 мамыр аралығында өтетін Түрік асханасы апталығы биыл төртінші рет ұйымдастырылмақ. Бұл іс-шара Түркияның бай аспаздық мұрасын, дәстүрлі әрі пайдалы дайындалу әдістерін әлемге паш етуді көздейді.

Түрік асханасы апталығы жыл сайын әлемдегі Түркия өкілдіктерінің мәдени шаралары мен әлеуметтік желі науқандары арқылы атап өтіледі. Мыңдаған жылдық тарихы мен мәдени алмасудың нәтижесінде қалыптасқан түрік тағамдары бүгінгі күнге дейін маңыздылығын сақтап келеді және биылғы апталықта дәстүрлі тағамдар арқылы паш етіледі.

Түрік ас үйінің негізгі тағамдары елдің құнарлы жері мен ғасырлық дәстүрлерін көрсете отырып, іс-шаралар барысында түрік меймандостығының жылы шуағын сездіреді. Жергілікті және маусымдық өнімдерден дайындалған қарапайым, бірақ ерекше бұл тағамдар түрік аспаздығының тірегі болып, үнемділік, пайдалылық және қонақжайлылық құндылықтарын паш етеді.

Биылғы мәзірде: жасымық пен тархана сорпасы, имамбаялды (пияз және томат салмасы қосылған баклажандар), манты, картоп, ет, ірімшік немесе көкөніспен толтырылған түрлі бәліштер, сондай-ақ «Карныярық-палау-джаджык» (тартылған етпен толтырылған жарылған баклажан- күріш-сүзілген қатыққа қияр мен сарымсақ қосып жасалған суық соус), «Куру фасулье-палау-тұздалған көкөністер» (ақ бұршақтан жасалған бұқтырма), «Долма-айран» (жүзім жапырағынан долма) сынды тағам үйлесімдері ұсынылады. Бұған қоса, «Бостан» және «Чобан» салаттары мен дәстүрлі «Хошафтар» (жеміс қайнатпалары) дастарқанның көркін аша түседі. Ал десерт ретінде «Тавукгёгсю» (тауық төсінен жасалған пудинг), «Казандыби» (күйдірілген сүт пудингі), пахлава секілді тәттілер ұсынылады.

Түрік асханасы апталығы – тек ұлттық дәмдердің ғана емес, аймақтық ерекшеліктердің де көрінісі. Түркияның әр өңірі өзіне тән климат, жергілікті өнімдер мен ғасырлар бойғы мәдениет ықпалы арқылы қалыптасқан тағамдарын ұсынады. Эгей теңізі жағалауындағы зәйтүн майымен әзірленетін тағамдардан бастап, Оңтүстік-шығыстың ащылау дәмдері мен Қаратеңіз өңірінің теңіз өнімдеріне дейін – бұл апталық Түркияның гастрономиялық байлығын жан-жақты таныстырады.