Өндіріс әйелдері – экономиканың тірегі: Самар ауданында Жаңа Конституцияның маңызы түсіндірілді

Самар ауданының әкімі Серік Жеңісов ауданның жетекші әрі экспортқа бағытталған кәсіпорындарының бірі – «Дигам» ЖШС-не барды. Мұнда ұжымның едәуір бөлігін әйелдер құрайды. Кездесу өндірістік цехтарда, ресми рәсімдерсіз – жұмыс үстелдері, жабдықтар мен дайын өнімнің арасында өтті. Аудан әкімі кәсіпорын қызметкерлерін мерекемен құттықтап, өңірдің дамуына қосқан үлестері үшін алғыс хаттар мен гүлдер табыстады.

— Бұл кәсіпорын ауданымыздағы жетекші әрі экспортқа бағытталған өндірістердің бірі. Осы кәсіпорыннан түсетін салықтардың есебінен ауданда мектептер салынып, өмір сүру жағдайы мен инфрақұрылым жақсарып келеді. Сондықтан сіздер, біздің аяулы да ардақты әйелдеріміз, өз еңбектеріңізбен ауданның дамуына зор үлес қосып отырсыздар деп сеніммен айтуға болады. Біз сіздерге шынайы алғысымызды білдіреміз, — деді Серік Жеңісов.

Бүгінде «Дигам» ЖШС Шығыс Қазақстандағы балық өңдеу саласында өз орнын нық қалыптастырған кәсіпорындардың бірі. Мұнда 50-ден астам адам еңбек етеді, олардың 30-ға жуығы – әйелдер. Кәсіпорында шикізаттың үш түрі өңделіп, экспортқа филе, фарш және басқа да балық өнімдері шығарылады. Өндірістік қуаты тәулігіне шамамен 3,5 тоннаны құрайды. Кәсіпорынның жұмыс барысымен таныстыру кезінде директор Александр Нарожнев өндірістік көрсеткіштер мен жаңғырту жұмыстары туралы айтып берді.

— Қазір филе дайындау цехында әр ауысымда жеті әйел жұмыс істейді. Әрқайсысы бір ауысымда 450 килограмға дейін шикізат өңдей алады, — деді кәсіпорын басшысы.

Оның айтуынша, өткен жылы кәсіпорын шикізатты өнеркәсіптік жолмен тазалау және филелеу үшін жаңа жабдық сатып алған. Бұл жұмысшылардың еңбегін едәуір жеңілдеткен.

— Бұрын тазалау учаскесінде сегіз адам жұмыс істеп, олар қарапайым құралдардың көмегімен шикізатты қолмен қабыршағынан тазалайтын. Қазір алты адамның өзі жеткілікті, әрі тазалау автоматты түрде жүргізіледі. Босап қалған қызметкерлер жұмысты күшейту қажет болған басқа цехтарға ауыстырылды, — деп түсіндірді Александр Нарожнев.

Қызметкерлердің орташа жалақысы кемінде 300 мың теңгені құрайды. Автоматтандыру шикізаттың жүзбеқанаттарын, құйрығы мен басын кесу сияқты операцияларды оңтайландырып, қосымша физикалық күш түсірмей-ақ өңдеу көлемін арттыруға мүмкіндік берді.

— Біз өндірістік процестерді автоматтандырдық. Соның арқасында, мысалы, филе дайындау цехындағы қызметкерлеріміз операцияларды оңтайландыру арқылы бір ауысымда көбірек өнім өңдей алады және өз күш-жігерін үнемдейді, — деп атап өтті кәсіпорын директоры.

Кездесу барысында аудан әкімі 15 наурызда Қазақстанда Жаңа Конституция жобасы бойынша республикалық референдум өтетінін де еске салды.

— Жаңа Конституция жобасы мемлекеттік институттарды одан әрі нығайтуға, азаматтардың елді басқару ісіне қатысуын кеңейтуге және билік жауапкершілігінің ашық жүйесін қалыптастыруға бағытталған. Бұл – мемлекет дамуының маңызды кезеңі. Елдің болашағы әр азаматтың ұстанымына байланысты. Сондықтан референдумға қатысу – тек құқық қана емес, азаматтық жауапкершіліктің көрінісі, — деді Серік Жеңісов.

Кездесу соңында аудан әкімі ұжымға тұрақты еңбегі мен аудан экономикасына қосқан үлесі үшін алғыс айтып, дәл осындай кәсіпорындар әлеуметтік саланың дамуына және халықтың өмір сапасын арттыруға берік негіз қалыптастыратынын атап өтті.