Бас прокуратура арандатушыларға ермеуге шақырды
Бас Прокурордың орынбасары Болат Дембаев қазақстандықтарға үндеу жасады. Ол 2019 жылғы 7 ақпанда Жамбыл облысының Қордай ауданында жаппай төбелес болғанын атап өтті. Үндеудің мәтіні Бас прокуратураның сайтында жарияланды.
Бүгінге бірқатар қылмыстық істер тергелуде, олардың барысында барлық кінәлілерді анықтап, заңмен белгіленген жауаптылыққа тарту үшін шаралар қамтамасыз етілетін болады. Дегенмен, жекелеген тұлғалар болған оқиғаларды бұрмалай отырып, ұлттық негіздегі құқыққа қарсы әрекеттерге шақыру арқылы көрінеу жалған ақпаратты қасақана таратуда, деп атап өтті Дембаев.
Сондай-ақ, Бас прокурордың орынбасары әлеуметтік желілер мен мессенджерлерде бейне- және аудиоматериалдарды орналастырудың жаңа фактілері, соның ішінде Қордай ауданындағы оқиғаларға байланысты емес және өңір мен елдегі ұлтаралық тұрақтылыққа қауіп төндіретін жайттар тіркеліп жатқанын атап өтті.
Құқық қорғау органдары осындай арандатушылық жарияланымдардың авторларының жеке басын анықтап, олар қылмыстық жауапкершілікке тартпақ.
Алматы қаласында 1990 және 1987 жылдары туылған екі азамат «Facebook» әлеуметтік желісінде зорлық-зомбылық жасауға шақырған.
2020 жылдың 9 ақпанында Тараз қаласының 1983 жылы туылған тұрғыны «WhatsApp» мессенджері арқылы осы тектес шақырулар таратқан.
Оларға қатысты Қылмыстық кодекстің 272-бабының 3-бөлігі (азаматтарды зорлық-зомбылыққа шақыру) бойынша сотқа дейінгі тергеп-тексеру басталыпты.
Заңдылықты, қоғамдық қауіпсіздікті қамтамасыз ету және құқық бұзушылықтардың алдын алу мақсатында еліміздің барлық тұрғындарынан менің үндеуіме көңіл аударуды сұраймын! Қазақстан Республикасы Конституциясының 39-бабы ұлтаралық келісімді бұзатын кез келген іс-әрекеттерге тыйым салады. Осы талапты бұзу ұлттық араздықты және алауыздықты қоздыру жөніндегі қасақана іс-әрекеттер (ҚК-тің 174-бабы), жаппай тәртiпсiздiкке не азаматтарға зорлық-зомбылық жасауға шақыру (ҚК-тің 272-бабы) және көрінеу жалған ақпарат тарату (ҚК-тің 274-бабы) қылмыстық жауаптылыққа әкеп соғады, дейді Бас прокурордың орынбасары.
Осыған байланысты азаматтарды шындыққа сәйкес келмейтін мәліметтерді таратпауға және арандатушылыққа берілмеуге шақырады.
Жамбыл облысының Қордай ауданындағы оқиғалар бойынша тергеу барысы мен нәтижелері туралы шынайы ақпарат бұқаралық ақпарат құралдарында, ішкі істер және прокуратура органдарының ресми Интернет-ресурстарында орналастырылуда, қоғамға брифингтерде жеткізілуде. Құқық қорғау органдары кез келген құқық бұзушылықтардың жолын кеседі және оларды болдырмау жөнінде заңда көзделген шараларды қабылдайды, делінген үндеуде.
