Алик Шпекбаев: «Сыбайлас жемқорлықтың алдын алу үшін қоғамдық бақылауды күшейту керек»

ҚР Президенті Қасым-Жомарт Тоқаевтың «Халық үніне құлақ асатын мемлекет» тұжырымдамасын іске асыру жөніндегі жергілікті атқарушы органдардың қызметі бақылауда. Биліктің бір саласының аяқ алысын бағамдау үшін Сыбайлас жемқорлыққа қарсы іс-қимыл агенттігінің Төрағасы Алик Шпекбаев жұмыс сапарымен Алматы облысына барды, деп хабарлайды BasNews.kz.

Антикор басшысы Қарасай және Іле аудандарының ауылдық округ әкімдіктерін аралап, өңірлердің әкімдеріне қызмет көрсетудің сервистік моделіне көшу қажеттілігі туралы ұсыныстар берді.
Алик Шпекбаев тоқтаған, нысанның бірі Қарасай ауданы Береке кентінің Мәдениет үйі болды, онда Антикор және Мәдениет пен спорт министрлігінің «Парасат жолы» жобасы өз жұмысын бастады. Жергілікті тұрғындар осы бастаманы қолдай отырып, қоғамда ұлттық мәдениет пен руханият құндылықтарын ілгерілету жұмыстарына дайын екендіктерін білдірді.

Сондай-ақ, Төраға Іле ауданының Өтеген батыр кентінде Алматы облысының азаматтық сектор, бизнес-қоғамдастық өкілдерімен, мемлекеттік және жергілікті атқарушы органдарымен жұмыс кездесуін өткізді.

Іс-шараға ақпараттық-ағарту штабының, арнайы мониторингтік топтың өкілдері, облыстың Филип Моррис Қазақстан, Маревен Фуд Тянь-Шань, Азия Агро фуд және т.б. ірі өнеркәсіптік және азық-түлік компанияларының басшылары қатысты.

Өз сөзінде Агенттік Төрағасы: «Сыбайлас жемқорлыққа қарсы саясатты іске асыруда азаматтық бақылауды күшейтудің және азаматтар мен мемлекеттік қызметшілер арасында ақпараттық-түсіндіру жұмыстарын жандандырудың маңыздылығын атап өтті. «Сыбайлас жемқорлыққа қарсы табысты іс-қимылда негізгі екпін алдын алу шараларына қойылады, оның басшысы азаматтық бақылау институты және жауапты, парасатты бизнес», – деп атап өтті.

Осы тұрғыда, кәсіпкерлік қоғамдастыққа арнаған сөзінде Алик Шпекбаев тәуекелдерді басқару мен ішкі бақылау шеңберіндегі тиімді құрал ретінде комплаенс-қызметтер институтын заңнамалық айқындауға назар аударды, сондай-ақ жеке компаниялардың басшыларын осы жүйені өз кәсіпорындарына енгізуге шақырды.

Сонымен қатар, Алик Шпекбаев шенділерге «сыбайлас жемқорлықтың алдын алу бағытында біріншіден қоғамдық бақылауды күшейту керек»,- деп баса айтты.

Таза қоғамды қалыптастыру жолында мемлекеттік қызметтегі жұмыс істеп жүрген басшылардың ары, ойы, жүрегі, қолы таза болса сол ұжымдарда жемқорлыққа жол берілмейтіндігін Төраға мырза көптің қаперіне салды.

Тиімді мемлекеттік қызмет көрсетуді жетілдіру және сыбайлас жемқорлықтың тамырына балта шабуды көздеген кездесу соңында Агенттік Төрағасына Алматы облысының жергілікті атқарушы органдарының өңірде қабылданып жатқан сыбайлас жемқорлыққа қарсы шаралар бойынша жұмысы таныстырылды, ал азаматтық сектор өкілдері сыбайлас жемқорлықты алдын алу мәселелерінде алдағы кезеңге арналған өз жоспарлары туралы айтып берді.