Қалмұханбет Қасымов қызметінен босатылды
Қалмұханбет Қасымов Мемлекеттік күзет қызметінің бастығы қызметінен босатылды, – деп хабарлайды Basnews.kz тілшісі.
«Мемлекет басшысының Жарлығымен Қалмұханбет Нұрмұханбетұлы Қасымов Қазақстан Республикасы Мемлекеттік күзет қызметінің бастығы лауазымынан босатылды», – делінген хабарламада.
Мемлекет басшысы Қасым-Жомарт Тоқаевтың баспасөз хатшысы Берік Уәли Қалмұханбет Қасымов өзінің отставкаға және мемлекеттік қызметтен кету туралы өтініші бойынша лауазымынан босатылғанын айтты.
«Президент Қасым-Жомарт Тоқаев Қалмұханбет Қасымовты өзінің отставкаға және мемлекеттік қызметтен кету туралы өтініші бойынша Қазақстан Республикасы Мемлекеттік күзет қызметінің бастығы лауазымынан босатты.
Қасым-Жомарт Тоқаев Қалмұханбет Қасымовқа құқық қорғау органдарындағы ұзақ жылғы қызметі мен Мемлекеттік күзет қызметінің бастығы ретінде сіңірген еңбегі үшін алғыс білдірді», – деп жазды Берік Уәли Facebook-парақшасында.
Қалмұханбет Қасымов 64 жаста. Ол Алматы облысы Іле ауданы Дмитриевка ауылында дүниеге келген. Білімі жоғары, 1979 жылы Киров атындағы Қазақ мемлекеттік университетінің заң факультетін «заңгер» мамандығы бойынша бітірген. Полиция генерал-полковнигі.
1979 жылдан – Алматы облысы ІІБ Іле аудандық ІІБ тергеушісі, аға тергеушісі, тергеу бөлімшесінің бастығы, бастығының орынбасары. 1988 жылдан – Алматы облысы ІІБ қоғамдық тәртіпті қорғау бөлімі бастығының орынбасары.
1989 жылдан – Алматы облысы ІІБ Қапшағай қаласының ІІБ бастығы.
1992 жылдан – Алматы облысы Криминалдық милиция басқармасының бастығы, ІІБ бастығының бірінші орынбасары.
1997 жылғы наурыз-шілде аралығында – ІІМ Криминалдық полиция департаментінің бастығы.
1997-2003 жылдары – Алматы қаласы Ішкі істер Бас басқармасының бастығы. 2003-2005 жылдары – Алматы облысы Ішкі істер департаменті Ішкі істер Бас басқармасының бастығы.
2005 жылдан 2009 жылға дейін Қазақстан Республикасының бірінші вице-министрі, Ішкі істер вице-министрі болған. 2009 жылы Шығыс қазақстан облысы Ішкі істер департаментінің бастығы болды. 2011 жылдан 2019 жылға дейін еліміздің ішкі істер министрі болып жұмыс істеді.
Кейін Президенттің көмекшісі – Қауіпсіздік Кеңесінің хатшысы қызметін атқарды. 2020 жылдың қаңтарында Мемлекеттік күзет қызметінің бастығы болды.
2011 жылғы 14 желтоқсанда оған полиция генерал-лейтенанты атағы, 2015 жылғы мамырда полиция генерал – полковнигі атағы берілген.
