Ақмола облысында ауыл шаруашылығының үздіктері марапатталды
Кеше Ақмола облысында – елдің басты аграрлық өңірлерінің бірінде – ауыл шаруашылығы қызметкерлерін ұлықтауға арналған салтанатты іс-шара өтті. Салада үздік танылған мамандарға мемлекеттік және ведомстволық марапаттар, автокөліктер мен ақшалай сертификаттар табысталды.
Шара «Көкшетау» мәдениет сарайында ұйымдастырылды. Мұнда ауыл шаруашылығы өнімдерінің көрмесі қойылып, арнайы фотозоналар да жасақталды. Аграрларды құттықтаған Премьер-Министр Олжас Бектенов өңірдің агроөнеркәсіптік кешенді дамытуға қосқан зор үлесін атап өтті. Оның сөзінше, Ақмола облысы биыл рекордтық өнім жинап, «елдің астық қоймасы» мәртебесін тағы бір дәлелдеді.
Облыс әкімдігінің мәліметінше, жалпы астық түсімі 7,6 млн тоннадан асып, орташа өнімділік гектарына 16,3 центнерді құрады. Жиналған астықтың 70 пайыздан астамы 3-сыныпқа сәйкес келеді. Биыл ауыл шаруашылығын қолдауға 250 млрд теңге көлемінде қаражат бөлінді. Қаржылай қолдау субсидиялар, жеңілдетілген несиелер, техника лизингі мен инвестициялық жобаларды қаржыландыру арқылы көрсетілуде.
Облыс әкімі Марат Ахметжанов өндірістік көрсеткіштермен қатар, ауылдағы әлеуметтік мәселелерді де назардан тыс қалдырмау қажет екенін айтты. Ол еңбек адамының лайықты жалақысы мен бизнестің әлеуметтік жауапкершілігінің маңызын атап өтті. Сонымен қатар сала ардагерлеріне және бір ғасырлық еңбек тәжірибесі жинақталған әулеттерге – Түркіндер, Әріповтер, Закусиловтар, Искаковтар, Мұқышевтер және Құрманқұловтар отбасыларына алғыс білдірді.
Марапаттардың басым бөлігі жұмысшы мамандықтарының иелеріне бұйырды: сауыншылар, механизаторлар, малшылар, зоотехниктер және комбайншылар құрметке бөленді. «Еңбек адамы» аталымында марапатталғандарға алғыс хаттар мен 1 миллион теңге сертификат табысталды. Олардың қатарында «Родина» агрофирмасының сауу операторы Евгения Брауэр бар.
Жалпы, 73 ауыл шаруашылығы қызметкері мемлекеттік және ведомстволық наградаларға ие болса, тағы 153 маман аудандық деңгейде марапатталды. Сонымен бірге, жоғары нәтижеге қол жеткізген жеті қызметкер жаңа автокөлікке ие болды.
Шара қазақстандық эстрада жұлдыздарының концертімен қорытындыланды.
