Жаңа Конституция – ел болашағының стратегиялық бағыты

Жаңа Конституция жобасы – жай ғана заңнамалық құжат емес. Ол мемлекеттің алдағы даму бағытын, мемлекет, бизнес және қоғам арасындағы өзара іс-қимылдың жаңа моделін айқындайтын маңызды стратегиялық негіз болып табылады.

Құжаттың кең қоғамдық талқылау арқылы дайындалуы – дұрыс әрі маңызды қадам. Бұл әртүрлі көзқарастарды ескеруге және ашық диалог қалыптастыруға дайын екендікті көрсетеді. Ал сенім мен ашықтық болмаған жағдайда ұзақ мерзімді әрі тиімді шешімдер қабылдау мүмкін емес.

Жобада адамға басымдық берілуі ерекше маңызға ие. Адам құқықтары, әділеттілік, заң үстемдігі және жауапкершілік – декларативті ұғымдар емес, тұрақты қоғам мен орнықты экономиканың іргетасы. Бизнес үшін бұл – болжамдылық, инвестициялардың қорғалуы және болашаққа деген сенім.

Білімге, ғылымға, инновацияға және адами капиталды дамытуға басымдық берілуі де аса өзекті. Бұл – елдің ұзақ мерзімді дамуы мен халықаралық бәсекеге қабілеттілігінің негізгі шарты. Күшті білім мен заманауи технологиясыз тиімді экономика құру мүмкін емес.

Азаматтардың цифрлық ортадағы құқықтарының Конституция деңгейінде нақты айқындалуы – уақыт талабына сай шешім. Цифрландыру қауіп көзі емес, керісінше ашықтықты, сенімді және тең мүмкіндіктерді қамтамасыз ететін құралға айналуы тиіс. Технология ең алдымен адам игілігіне қызмет етуі қажет.

Жаңартылған Конституцияда мемлекеттік институттарды нығайтуға және мемлекет пен жеке бастама арасындағы тепе-теңдікті сақтауға ерекше назар аударылған. Ал мықты институттар – тұрақты әрі бәсекеге қабілетті экономиканың басты тірегі.

Жалпы алғанда, конституциялық реформалар Қазақстанның алдағы жылдардағы дамуына берік негіз қалыптастырып, қоғам мен экономиканың сапалы жаңаруына жол ашады.