BasNewsЖаңалықтар

Еліміздің барлық аймағында ХҚО-лар іске қосылды

Жергілікті билік органдарының шешімімен бүгін Жамбыл облысының, кеше Шымкент және Семей қалаларының ХҚО-лары жұмысын қайта бастады. Осылайша, республиканың барлық аймағында халыққа қызмет көрсету орталықтары ашылды, деп хабарлайды Basnews.kz.

Коронавирус пандемиясы жағдайында «Азаматтарға арналған үкімет» мемлекеттік корпорациясы қызмет алушыларды жаңа ережелерге сәйкес қабылдай бастады.

Атап айтқанда, азаматтардың көптеп жиналуын және вирусты жұқтыру қаупін болдырмау үшін халыққа қызмет көрсету орталығына бару үшін алдын ала бронь жасау қажет. Мұны egov.kz порталы, eGovKzBot2.0 (@Kenes1414Bot) телеграм-боты немесе 1414 байланыс орталығына қоңырау шалу арқылы жасауға болады.

ХҚО ғимараттарына кірушілерден қатаң түрде бетперде кию талап етіледі. Қашықтықты сақтау үшін 1,5-2 метр аралығында арнайы белгілер жасалған. Әр халыққа қызмет көрсету орталығында санитайзерлер бар.

Сонымен қатар, қазір ХҚО-дан онлайн түрде қолжетімсіз, тек «қағаз» жүзінде көрсетілетін қызметтерді алуға болады (106 қызмет).

Электронды қызметтерді қазақстандықтар әрі қарайда онлайн түрде үйлерінен немесе елімізде арнайы ашылған 600-ден астам egov бұрыштарынан алуын жалғастырады, тиісті қызметті алуға оларға 1414 байланыс орталығы мен виртуалды ассистенттің кеңес берушілері көмектесе алады. Таяу арада осындай тағы 400 egov бұрышы іске қосылады. Олар облыстық әкімдіктердің ғимараттарында, сауда және ойын-сауық орталықтарында, оқу орындарында және т.б. жерлерде орналастырылады.

Азаматтардың үш санаты электрондық қызметтерді бұрынғыдай халыққа қызмет көрсету орталықтарында ала алады, бұл – зейнеткерлер, көпбалалы отбасы мүшелері және мүгедектер. Әр фронт-офисте олар үшін жеңілдік терезесі жұмыс істейді. Олар да халыққа қызмет көрсету орталығына баратын уақытын алдын ала брондауы тиіс.

Айта кету керек, қызмет көрсетудің жаңа ережелері тек мегаполистердің, облыс орталықтарының және Семей қаласының ХҚО-ларын қамтиды.

Аудан орталықтарында орналасқан ХҚО-лар және аудандық маңызы бар фронт-офистер бұрынғыдай жұмыс істейді.

Back to top button