Сапасыз заң көмегі үшін қазақстандықтар сақтандыру төлемін талап ете алады
Қазақстандықтар сапасыз заң көмегі жасалса, сақтандыру төлемін алуға құқылы. Бұл туралы ҚР Әділет министрі Марат Бекетаев мәлім етті, деп хабарлайды Basnews.kz.
«Биылдың 1 қаңтарынан бастап адвокаттар мен заң консультанттарына өздерінің кәсіби қызметін сақтандыру міндеті жүктелген. Енді адвокат немесе консультант сапасыз заң көмегін көрсету арқылы залал келтірсе, оның ішінде құжаттарды дұрыс рәсімдемесе және әрекетсіздік танытса, онда азаматтар сақтандыру өтемақысын талап ете алады», – деді министрі онлайн режимде халық алдында есеп беру барысында.
Ол үшін заң көмегіне шарт жасау кезінде адамдар адвокаттан және консультанттан кәсіби жауапкершілігін сақтандырғаны туралы құжаттың көшірмесін сұрауға құқылы.
Бұдан бұрын хабарланғандай, министр елімізде заң көмегін ақысыз алу тәртібі туралы айтты.