ТҮРКІСТАН: ӘР АЗАМАТТЫҢ ҮНІ ЕСТІЛЕДІ
Облыс әкімінің орынбасары азаматтарды қабылдап, шешім жолдарын ұсынды
Түркістан облысында халықпен ашық диалог құруға, азаматтардың нақты мәселелерін шешуге бағытталған жұмыстар жүйелі түрде жүргізілуде. Бұл орайда қоғамдық қабылдаулар – тұрғындардың үнін естіп, билік пен қоғам арасындағы байланысты нығайтуда аса маңызды құралға айналып отыр. Жуырда осындай қоғамдық қабылдаудың кезекті отырысы өтті.
Түркістан облысы әкімінің орынбасары Бейсенбай Тажібаев облыстық AMANAT партиясы филиалының ғимаратында азаматтарды жеке сұрақтары бойынша қабылдады. Бұл қабылдау барысында өңір тұрғындары өздерін толғандырып жүрген әлеуметтік, құқықтық және тұрмыстық мәселелерді еркін жеткізуге мүмкіндік алды.
Қабылдауға AMANAT партиясы Түркістан облыстық филиалы атқарушы хатшысының орынбасары Қалыйма Жантореева да қатысты. Ол партия тарапынан барлық көтерілген мәселелерді бақылауға алып, тиісті мекемелерге жолдау және орындалуын қадағалау жұмыстары жүргізілетінін мәлімдеді.
БІЛІМ – БАСТЫ НАЗАРДА
Қабылдауға келген азаматтардың басым бөлігі білім саласына қатысты мәселелерді көтерді. Олардың ішінде мектепке жұмысқа орналасу кезінде туындайтын әкімшілік кедергілер, жұмысқа қабылдаудағы әділетсіздік, кей жағдайларда заңсыз жұмыстан шығару фактілері туралы шағымдар жиі кездесті. Сонымен қатар, педагогикалық білім алғанымен, мамандығына сай жұмысқа тұра алмай жүрген жас мамандар мен жұмыс іздеушілер облыс әкімінің орынбасарына өз өтініштерін ашық білдірді.
Олар өздерінің кәсіби біліктілігіне сай жұмыс тауып, қоғамға пайдасын тигізгісі келетінін айтты. Бұл ретте, білім беру мекемелеріндегі кадрлық саясаттың ашықтығын қамтамасыз ету және меритократия қағидатын сақтау мәселесі ерекше назарға алынды.
ДЕНСАУЛЫҚ САҚТАУ: ҚОЛЖЕТІМДІЛІК ПЕН ЖАУАПКЕРШІЛІ
Тұрғындардың тағы бір алаңдаушылық танытқан саласы – денсаулық сақтау жүйесі. Кейбір азаматтар емханалар мен ауруханаларда кездесетін дәрігерлердің немқұрайлылығы, қызмет көрсету сапасының төмендігі, тегін дәрі-дәрмекке қол жеткізудегі қиындықтар туралы айтты.
Бұдан бөлек, мүмкіндігі шектеулі азаматтардың медициналық қызметке қолжетімділігі, кезек күту мерзімінің тым ұзақ болуы, мамандардың жетіспеушілігі мәселелері де көтерілді. Бұл – жалпы өңірдің әлеуметтік-денсаулық сақтау жүйесінде әлі де жүйелі шешімді қажет ететін түйткілдердің бар екенін көрсетеді.
ӘЛЕУМЕТТІК ҚОРҒАУ ЖӘНЕ ТҰРҒЫН ҮЙ МӘСЕЛЕСІ
Қабылдауға келген кейбір азаматтар әлеуметтік жағдайының төмендігіне, жұмыссыздыққа, зейнетақы мен жәрдемақы көлемінің жеткіліксіздігіне, сондай-ақ тұрғын үйге кезектің баяу жылжуына алаңдаушылық білдірді. Әсіресе көп балалы аналар, жалғызбасты ата-аналар мен тұрмысы төмен отбасылар мемлекет тарапынан берілетін көмек пен қолдау шараларының тиімді орындалуына қатысты ұсыныс-пікірлерімен бөлісті.
Азаматтар кейбір мемлекеттік бағдарламалардың өңірлерде біркелкі орындалмайтынын, ақпараттың қолжетімсіздігін және нақты тетіктердің жетіспейтінін тілге тиек етті.
ӘКІМ ОРЫНБАСАРЫ НЕ ДЕДІ?
Облыс әкімінің орынбасары Бейсенбай Тажібаев әрбір азаматты жеке тыңдап, қойылған сұрақтарға заң аясында нақты жауаптар берді. Ол ешбір өтініш назардан тыс қалмайтынын, барлық мәселелер бойынша тиісті басқармалар мен бөлімдерге нақты тапсырмалар берілетінін мәлімдеді.
– Азаматтардың көтеріп отырған мәселелері – бұл жай шағым емес, қоғамдағы нақты проблемалар. Біз оларды шешу арқылы халықтың билікке деген сенімін арттырамыз. Қабылдауда айтылған барлық өтініштер мен ұсыныстар тиісті сала жетекшілеріне жолданып, орындалуы қатаң бақыланады, – деді әкім орынбасары.
Сонымен қатар, ол азаматтарды өз құқықтарын білуге, тиісті ақпарат көздеріне жүгінуге, әрі партия мен мемлекеттік органдар тарапынан беріліп жатқан мүмкіндіктерді тиімді пайдалануға шақырды.
AMANAT ПАРТИЯСЫ БАҚЫЛАУДА ҰСТАЙДЫ
Қоғамдық қабылдау соңында партия филиалының өкілі Қалыйма Жантореева AMANAT партиясы өз азаматтарының үніне құлақ түретінін, әрбір сұрақ – жауапсыз қалмайтынын айтты. Партия тарапынан барлық өтініштер мен шағымдар тиісті мемлекеттік мекемелерге жолданып, жүйелі бақылау жүргізілетіні жеткізілді.
– Халықтың көтерген әр мәселесі – біз үшін маңызды. AMANAT партиясы елмен бірге, халықпен бірге. Бұл – біздің басты ұстанымымыз, – деді ол.
ХАЛЫҚ ҮНІНЕ ҚҰЛАҚ АСАТЫН МЕМЛЕКЕТ – ІС ЖҮЗІНДЕ
Бұл қоғамдық қабылдау – «Халық үніне құлақ асатын мемлекет» қағидатының өңірлік деңгейде нақты жүзеге асып жатқанын айқын көрсетеді. Азаматтардың ашық сұхбат құруға, өз проблемаларын айтуға мүмкіндік алуы – демократиялық қоғам дамуының бір көрінісі. Мұндай кездесулер тұрғындардың билікке деген сенімін арттырып, өңірдің әлеуметтік дамуына тың серпін береді.
