Түркістан облысында полицейлер киберқауіпсіздік бойынша профилактикалық кездесу өткізді
Түркістан облысы Полиция департаменті Киберқылмысқа қарсы іс-қимыл басқармасының бастығы Қуаныш Жұмаділдаев «Заң мен тәртіп» қағидатын іске асыру аясында Бәйдібек ауданы С. Әбдіжаппаров атындағы мектептің оқушылары мен педагогикалық ұжымымен арнайы профилактикалық кездесу өткізді. Аталған іс-шараға 300-ден астам оқушы қатысып, интернет кеңістігіндегі қауіпсіздік мәселелері бойынша маңызды ақпарат алды.
Кездесудің негізгі мақсаты – кәмелетке толмағандар арасында интернет-алаяқтықтың алдын алу, ақпараттық қауіпсіздік мәдениетін қалыптастыру, сондай-ақ киберкеңістіктегі түрлі қауіп-қатерлерден қорғану жолдарын түсіндіру және жасөспірімдердің құқықтық сауаттылығын арттыру болды. Бұл бағыттағы жұмыстар қоғамдағы цифрлық қауіпсіздікті қамтамасыз етудің маңызды бөлігі ретінде қарастырылады.
Іс-шара барысында Қуаныш Жұмаділдаев интернет-алаяқтықтың кең таралған түрлеріне тоқталып, олардың жасалу тәсілдерін нақты мысалдар арқылы түсіндірді. Атап айтқанда, жалған хабарламалар тарату, фишингтік сілтемелер арқылы деректерді иемдену, онлайн кредит рәсімдеу, жалған инвестициялық жобаларға тарту және әлеуметтік желілер арқылы жасалатын алаяқтық әрекеттер туралы жан-жақты ақпарат берілді. Сонымен қатар мұндай құқық бұзушылықтардың қоғам үшін қауіптілігі және олардың құқықтық салдары түсіндірілді.
Жиын барысында жеке деректердің қауіпсіздігіне ерекше назар аударылды. Оқушыларға күмәнді сілтемелерге өтпеу, бейтаныс тұлғаларға жеке ақпаратты бермеу, күрделі құпиясөздерді қолдану және екі факторлы аутентификацияны қосу сияқты негізгі киберқауіпсіздік ережелері егжей-тегжейлі түсіндірілді. Бұл шаралар интернеттегі алаяқтықтың алдын алудағы ең тиімді әдістердің бірі екені атап өтілді.
Сонымен қатар кәмелетке толмағандар арасында кең таралуы мүмкін буллинг және кибербуллинг мәселелері де назардан тыс қалмады. Оның түрлері, психологиялық және әлеуметтік салдары, сондай-ақ заңнамада көзделген жауапкершілік нормалары түсіндірілді. Оқушыларға өзара сыйластықты сақтау, интернет кеңістігінде әдеп нормаларын ұстану және кез келген қысым немесе қорқыту жағдайында ата-аналарға, мұғалімдерге немесе құқық қорғау органдарына жүгіну қажеттігі айтылды.
Кездесу интерактивті форматта өтіп, оқушылар белсенді түрде сұрақтар қойып, киберқауіпсіздікке қатысты өздерін толғандырған мәселелер бойынша толық әрі нақты жауаптар алды. Полиция қызметкерлері жастардың цифрлық ортадағы қауіпсіздігін қамтамасыз ету – бүгінгі күннің маңызды міндеттерінің бірі екенін атап өтті.
Мұндай профилактикалық іс-шаралар кәмелетке толмағандардың құқықтық және ақпараттық сауаттылығын арттыруға, олардың интернет кеңістігіндегі қауіпсіз мінез-құлық дағдыларын қалыптастыруға, сондай-ақ қоғамда заңдылық пен құқықтық тәртіпті нығайтуға ықпал етеді.
