ЦИФРЛЫҚ ҚАЗАҚСТАН: ЖАСАНДЫ ИНТЕЛЛЕКТ – ЖАҢА ЭКОНОМИКАНЫҢ ҚОЗҒАУШЫ КҮШІ
Мемлекет басшысы Қасым-Жомарт Тоқаев 2026 жылғы 28 қазандағы Қазақстан халқына Жолдауында цифрлық экономиканы қалыптастыру мен жасанды интеллект технологияларын кеңінен енгізу мәселесіне ерекше тоқталды.
Президенттің айтуынша, Қазақстан технологиялық тұрғыдан дамыған мемлекетке айналу үшін цифрландыруды жаңа деңгейге көтеріп, заманауи технологиялардың мүмкіндіктерін экономиканың барлық саласында тиімді пайдалануы қажет.
Жолдауда еліміздің цифрлық инфрақұрылымын дамыту бағытында бірқатар жұмыстар атқарылғаны атап өтілді. Атап айтқанда, екі суперкомпьютер іске қосылып, жыл соңына дейін үшінші қуатты суперкомпьютерді пайдалануға беру жоспарланған. Сонымен қатар Каспий теңізінің түбімен талшықты-оптикалық магистраль тарту аяқталып, деректерді өңдеу орталықтарының құрылысы жүргізілуде.
Мемлекет басшысы цифрландыру тек жаңа технологияларды сатып алумен немесе қолданыстағы үдерістерді автоматтандырумен шектелмеуі керектігін атап өтті. Оның негізгі мақсаты – нақты экономикалық нәтиже беріп, азаматтардың мүмкіндіктерін кеңейту.
Осы ретте цифрлық платформаларды дамыту, жасанды интеллектіні экономикаға енгізу, цифрлық жұмыспен қамту мүмкіндіктерін кеңейту және өңірлерде пилоттық жобаларды іске қосу міндеттері белгіленді.
Бұл бағыт Ұлытау облысы үшін де өзекті. Цифрлық шешімдерді өндіріс, білім беру, медицина, мемлекеттік қызмет көрсету және кәсіпкерлік салаларында тиімді пайдалану өңірдің экономикалық әлеуетін арттыруға мүмкіндік береді.
Цифрлық трансформация – тек технологиялық жаңару емес, бұл азаматтардың өмір сүру сапасын жақсартуға және елдің бәсекеге қабілеттілігін арттыруға бағытталған маңызды қадам.
