Еліміздің Ішкі істер министрлігінің өкілдері Жамбыл облысы Қордай ауданындағы тәртіпсіздіктер салдарынан қаза болғандардың арасында Масаншыға басқа ауылдан келген бір адам болғанын растады, — деп хабарлайды Tengrinews.kz тілшісі.
«Дархан Әбдірахым туралы не білеміз? Ол — қазақ. Осы күнге дейін туған-туыстары оның қайтыс болғаны туралы хабар алған жоқ. Дархан жеке тасымалдаумен айналысқан. Оның құжаттары машинада болған. Қақтығыс болған түнде ол Масанчиге ауданның басқа тұрғындары сияқты көмекке барған. Жігіт 25 жаста еді. Ол қан-жоса болып жатқан жерінен табылған. (…) Машина бүлінген, құжаттар жоғалған. Ол отбасында жалғыз бала еді. Оның артында үш баласы қалды. Көлігін кредитке алған. Жергілікті атқарушы органдардан қайтыс болған адамның ата-анасына әлі ешкім барған жоқ. Журналистер де болған жоқ. Өткен күннен бері қаза тапқан жас жігіттердің есімі таралды. Неге Дархан туралы мәлімет белгісіз?», — деп жазды Азамат Ерғали Facebook-те.
ҚР ІІМ баспасөз қызметіндегілер Дархан Әбдірахымның қаза тапқан 10 адамның ішінде барын растады.
«Иә, ол (Дархан Әбдірахым) қаза тапқан 10 адамның ішінде бар», — деді баспасөз қызметіндегілер.
Еске салайық, 7 ақпанда Жамбыл облысы Қордай ауданы Масаншы ауылында тұрғындар арасында жаппай төбелес болды. Оқиға салдарынан 10 адам қаза тапты.
