6 күн жарықсыз қалған СҚО тұрғындары төтенше жағдай жариялауды талап етті
Өткен демалыс күндері болған қатты дауыл 30 мыңнан астам абонентті жарықсыз қалдырды. Қазір үйлердің көбін жабдықтау қалпына келді. Бірақ халық бұл келесі қатты желге дейін ғана шыдайтынына сенімді. Бұл туралы КТК телеарнасы хабарлады.
«Бүгінде жағдайымыз жақсарды, бірақ соған қарамастан, ауа-райының қолайсыздығынан және электр жабдықтарының, соның ішінде сымдардың жарамсыз болуына әрі тозғанына байланысты жаңадан бұзылуы мүмкін. Осыған назар аударып, шұғыл төтенше жағдай жариялаңыздар!» – деді Астраханка ауылының тұрғыны Айман Әбілмәжінова.
Облыста 46 жөндеу бригадасы апат режимінде жұмыс істеп жатыр. Бірақ мыңнан астам адам әлі бір аптаға жуық уақыт жарықсыз отыр. Сорғылардың электр қуатымен жұмыс істейтінін ескерсек, тұрғындарда әлі күнге дейін су мен жылу жоқ.
Батыс Қазақстан облысында да жағдай осындай. Дауылдан кейін мыңдаған абонент жарықсыз қалды.
«Жалпы облыс бойынша, тіпті қала бойынша қаламыздағы электр желілерінің жағдайы өте нашар. Яғни облыс бойынша 80%, қала бойынша 60% тозған. Соның негізінде тұрғын үй және Облыстық коммуналдық шаруашылық басқармасы бірнеше жобаны әзірлеп жатыр. Республикалық бюджеттен қаржы бөлінсе, тиісінше жұмыс атқарылады», – деп түсіндірді Орал қаласы әкімінің орынбасары Жандос Дүйсенғалиев.
Солтүстік Қазақстанда қатты қарлы боранның салдары әлі де қалпына келіп жатыр. Ақмола облысында да жағдай осындай, ол жерде де су мұнарасы құлаған. Павлодар мен Қарағанды облыстарының қалалары мен ауылдарында төтенше жағдай режимі енгізілді.