Талғар тұрғыны өгей қызын өлтірді

Алматы облысының 47 жастағы тұрғыны 13 жастағы өгей қызын өлтірді деген күдікпен қамауға алынды, – деп хабарлайды Basnews.kz тілшісі.

Ақпарат бойынша, 23 шілдеде Талғардағы жеке үйлердің бірінен 13 жастағы қыздың зорлық белгілері бар мәйіті табылған. Дерек ҚР ҚК 99-бабы 3-бөлігі «Адам өлтіру» бойынша СДТБТ-де тіркелді.

«Оқиға орнына келген жедел-тергеу тобы қажетті іс-шаралар өткізіп, аса ауыр қылмыс жасады деп күдіктелген 47 жастағы өгей әкені анықтады. Ер адам қыздың анасымен азаматтық некеде екені белгілі болды. Оқиға орнынан бой тасалаған күдіктіні Алматы облысы ПД криминалдық полиция қызметкерлері Алматы аумағында ұстады», – деп хабарлады облыстық полиция департаментінің баспасөз қызметі өкілі.

Полицейлер балаларға қатысты зорлық-зомбылықтың алдын алуға бағытталған заңнаманың қатаңдағанына қарамастан, мұндай қылмыс әлі де жасалатынын айтты.