Құрметті достар!
Бүгінде ақпарат өте көп. Ал жаңалық тарататын ақпараттық (өздерін солай атайтын) порталдар одан да көп. Әлбетте, бәрінің мақсаты оқырманға объективті мағлұмат беру деп үміттенемін.
Маған осы сайтты басқару туралы ұсыныс түскенде ұзақ ойландым. Қаптап кеткен сайттар, бір оқиғаны мың құбылтатын блогерлері бар әлеуметтік желі, түрлі хабарлама лезде тарайтын мессенжерлер тұрғанда жаңалықтар порталын ашу, оны басқару кімге абырой береді?…
Енді осы жазбаға қарап келісім бергенімді түсінген боларсыздар. Телеарнадағы жаңалықтарда біраз жыл жинаған аз-маз тәжірибемді осы жерде сынап көрмекпін. Мен үшін тың дүние. Сонымен, келісім беруімнің себебі бірнешеу:
– сайт біреудің сойылын соқпайды. Барды бар, жоқты жоқ деп қана береміз. Демек «досымыз» аз болады;
– нақты айғақпен дәлелденген жаңалықты жасырып қалмаймыз. Демек «дос еместер» көп болатын шығар;
– жаңалықты біреуден бұрын беруге тырысып бас-көзге қарамай жариялаудан бас тартамыз, бағытымыз сараптама, беделді мамандардан эксклюзив сұхбат болмақ. Міне, осы жерде нағыз достарымызды оқырман арасынан тапқымыз келеді.
Ең ұзақ жол бірінші қадамнан басталады. Егер ұсыныстарыңыз, ескертулеріңіз, сондай-ақ қызықты жаңалықтарыңыз болса бөлісулеріңізді сұраймыз. Бізге сіздің қолдауларыңыз өте қажет. Бәріміз бірігіп бәз біреулер «қоқыс алаңы» атап кеткен ақпарат алаңының санитары болуға тырысайық.
Байланысу өте оңай:
- Поштамыз:
- Телефон/WhatsApp:
+7 777 427 57 01
- Әлеуметтік желіде:
Ізгі ниетпен, BASNEWS.KZ порталының бас редакторы Медетжан Ізғұтты
