Абақтыда отырған «Дикий Арман» жоғалып кетті

Арман Жұмагелдиевтің адвокаттары оны Алматыдағы тергеу изоляторынан алып шыққанын айтты. Қамауда отырған Арман Жұмагелдиевтің қазір қайда екені белгісіз, – деп хабарлайды  Basnews.kz тілшісі.

Қаңтар оқиғасы кезінде Алматыда алаңға шыққан «Дикий Арман» лақап атымен танымал Арман Жұмагелдиевті құқық қорғау органдары қамауға алған еді. Ал, бүгін әлеуметтік желі мен БАҚ-та оның тергеу изоляторында жоқ екені туралы ақпарат тарады.

Дәлірек айтсақ, бүгін Жұмагелдиевтің адвокаты Талғат Есімов өзінің әлеуметтік желідегі парақшасына Ұлттық Қауіпсіздік комитетінің Алматы қалалық департаментінің уақытша ұстау изоляторының жанында тұрған видеосын жүктеді.

«Бізге бейресми дереккөздер бойынша белгілі болғандай, қорғауымыздағы Арман Жұмагелдиевті осы жерге әкелген. Бірақ, қазір ол ешқайда жоқ. Департаменттің кезекшісі изолятордың телефонын бере алмады», – дейді Талғат Есімов.

Осы сөздерден кейін ол ары қарай департамент ғимаратына кіргісі келгенмен, есігі жабық екенін көрсетеді. Адвокаттың айтуынша, құзырлы органдар Жұмагелдиевтің қайда екеніне қатысты әзірге жауар бермеген.