Түркия 2025 жылдың сауықтыру туризміндегі көшбасшысы атанды

Сарапшылардың пайымдауынша, сауықтыру туризмі 2024–2029 жылдар аралығында жылына орта есеппен 9,1%-дық өсім көрсетпек. Осындай қарқынды даму үрдісінде әл-ауқат (well-being) ұғымы тұрмыс салтына айналған Түркия — тән мен рухты түлетудің теңдессіз орталығына айналды.

Ғасырларға ұласқан хамам дәстүрі, минералды қайнарлар, заманауи SPA-орталықтар мен Жерорта теңізінің құнарлы ас мәзірі елдің туристік әлеуетін айшықтай түседі. Осы орасан зор мүмкіндіктерінің арқасында Түркия Matador Network нұсқасы бойынша «2025 жылдың ең үздік Wellness бағыты» аталымын иеленді.

Түрік еліндегі сауықтыру мәдениетінің өзегі — хамам. Ыстық бу мен жылудың үйлесімі теріні жібітіп, ағзаны зиянды заттардан тазартып қана қоймай, жанға терең тыныштық сыйлайды. Стамбулдың тарихи орамдарынан бастап Бурсаның ежелгі көшелеріне дейін кез келген өңірде көне мен жаңаның астасқан үлгілерін кездестіруге болады.

Мысалы, Стамбулдағы Zeyrek Çinili Hamam — Time Magazine журналының «Әлемнің ең үздік орындары» тізіміне енген, тарих қойнауына саяхат жасататын бірегей нысан. Бүгінде дәстүрлі хамам рәсімдері медитация, тыныс алу терапиясы және теңіз суымен емдеу (талассотерапия) сияқты инновациялық бағдарламалармен шебер ұштасқан.

Анадолының шипалы қайнарлары: Табиғат сыйлаған ем

Ежелгі Хиераполис пен Пергамон сынды көне емдеу орталықтарының ізі қалған Анадолы — бүгінде әлемдегі ең ірі термалды аймақтардың бірі. Түркия минералды ресурстары бойынша әлемде 7-орынды, ал Еуропада көшбасшылықты иеленіп отыр.

Температурасы 20°С-тан 110°С-қа дейін жететін шипалы сулар ревматизмнен бастап, тері және қан тамырлары ауруларына дейін емдік әсерін тигізеді. Ең басты шипажайлық нүктелер:

• Афёнкарахисар — термалды туризмнің орталығы;

• Бурса —  тарихи емдік сулар мекені;

• Памуккале (Денизли) — ЮНЕСКО мұрасы және Еуропалық тарихи термалды қалалар маршрутының мүшесі.

Жағалау терапиясы: «Quietcation» және байсалды өмір салты

Түркиядағы wellness концепциясы тек термалды аймақтармен шектелмейді. Эгей мен Жерорта теңізінің жағалаулары — климаты жұмсақ, тыныс-тіршілігі баяу демалысты қалайтындар үшін таптырмас мекен.

• Измир — өмір сапасы жоғары Эгей інжу-маржаны;

• Бодрум — талғампаздық пен сән-салтанаттың символы;

• Анталия — теңіз бен күннің шуақты орталығы.

Бұл өңірлерде қазіргі таңда «quietcation», яғни гаджеттерден алшақтап, табиғатпен үндесу үрдісі белең алуда. Бодрумдағы әлемге әйгілі детокс-клиникалар мен йога-ретриттер адамның өмір ырғағын баяулатып, ішкі тепе-теңдікті қалпына келтіруге мүмкіндік береді.

Түйіндей айтқанда, Түркия ұсынатын wellness тәжірибесі — жай ғана демалыс емес, бұл — өзіңізді қайта тану мен рухани түлеудің бірегей сапары. Ғасырлар бойы қалыптасқан халықтық дәстүрлер мен заманауи медицинаның озық жетістіктерін ұштастыра білген Анадолы жері әрбір саяхатшыға сарқылмас қуат пен ішкі тепе-теңдік сыйлайды.

Егер сіз 2025 жылы күнделікті күйбең тіршіліктен алшақтап, тән мен жанның үйлесімін іздесеңіз, Түркияның шипалы бағыттары сіз үшін ең мінсіз таңдау болмақ.